Shillong, Naitung 11 : Ka Myntri Pla Tyngka ka Ri Nirmala Sitharaman, kala leit kai burom ha Raj Bhavan, Shillong, hynne ka sngi Thohdieng ha ka jingwan iuhkjat jong ka ha Jylla.
Ia ka Myntri la pdiang sngewbha da u Lat ka Jylla u CH Vijayashankar.
Ka Myntri kala iashong khana ruh bad u Lat ka Jylla halor kiba bun ki kam ban myntoi lang, khamtam haba pynbeit jingmut sha ka ioh ka kot ka Meghalaya, ka jingpynroi ia ki kompani bad ka bynta ban pynrung pisa ha kaban pynkhlain ia ka sengkam sengjam ha ki paid nongshongshnong.
Kila iakren ruh halor ki prokram jong ka Sorkar India kiba dang iaid mynta hapoh ka Jylla kiba hap hapoh ka Viksit Bharat @2047, kynthup ka jingialap ban pynsuk ia ka sengkam sengjam ha Jylla, ka jingai jinghikai ha ka MSME, bad pynkhlain ia ka rukom pyniaid kam jong ki kompani hapoh ka thain Shatei Lam Mihngi.
U Lat ka Jylla ula kren shaphang ka jingdon kyrhai ki lad ha Meghalaya ban kiew ha ka liang ka kam jngohkai, ki karkhana marrep, ka thain jingthain bad ka roi ka par kaba neh bad iaroh ruh ia ka jingpyrshang ba khlem kut jong ka Sorkar Pdeng ban wanrah ia ki policy ki ba ai jingmyntoi ia ki Jylla barit.
Ula pynsngew ruh ia ki jingeh ba iadei bad ki lad pyniasoh, ki jingtei bapher bapher bad ka lad ka lynti ban iatreilang hapdeng ki bor treikam ka Jylla bad ka Sorkar Pdeng ban wanrah ia ka rukom treikam kaba shai bad kaba don jingkitkhlieh.
Ka Sitharaman kala iaroh ia ka jingriewspah ka Jylla ha ka kolshor bad ka mynsiem ban sengkam sengjam da ki paid nong shongshnong ka Jylla Meghalaya.
