Shillong, Nohprah 06: Ka Khasi Students’ Union (KSU) hynne ka sngi kala dawa naka North Eastern Indira Gandhi Regional Institute of Health and Medical Sciences (NEIGRIHMS) ban shah iaki samla trai ri trai muluk ba kin thoh eksamin hapoh ka Jylla kumba ki kwah.
Ki nongialam ka KSU kila kynduh ia u Director, NEIGRIHMS Prof (Dr.) Nalin Mehta bad aiti daka dorkhas ba pynpaw ka jingpyrshah halor ka jingphah thoh eksamin sha bar Jylla naka bynta ki kam ba lait haka grade B bad C.
Ka shithi ka kdew ba ka seng kala ioh pdiang ki jingujor ba bun ki samla trai ri trai muluk, ba ki hap ban leit thoh iaki eksamin thep kam haka grade B, C sha bar Jylla.
“Ka don ka jingsngew diaw naka liang ki samla trai Ri trai muluk namar iaki jaka thoh eksamin la pynhap khnang sha bar Jylla bad kane ka dei tang ka buit ban pynduh mynsiem iaki amla ban thep kam ha kane ka Hospital” ong u general secretary ka KSU samla Donald V Thabah haba kynthoh ba kane kam dei shuh ka sien ba nyngkong ba ki samla ka Meghalaya ki hap ban leit sha kiwei pat ki Jylla ban thoh iaki eksamin thep kam.
U samla Donald ula ong ka seng ka dawa naki bor ba khmih ba kidei ban sngewthuh ba ki samla trai ri trai muluk kiba thepkam ki wan naki longïing baduk bad ka buh jingeh bha iaki ban leit sha kiwei ki Jylla ban thoh iaka eksamin thepkam bad kane kadei hi ka jingleh khnang ban pynduh lad iaki trai ri trai muluk.
Ula ong ba ka tarik ba pynmih iaki Admit Card ka long kaba la slem bha bad wat kito kiba lah ban pynlut ban leit thoh eksamin sha kiwei ki Jylla ru, kila mad ia ka jingeh ba kin pynbiang kyrkieh iaki jingdonkam haka leit ka wan.
Ula ong ba ki don ki samla kiba thep kam bun tylli, bad lada ka jaka thoh eksamin bad ka tarik ka wan haka juh, kan buh jingeh bha iaki samla ban beh shala ki jaka ban thoh eksamin bad namar ki samla kila siew iaka bai thepkam, ka NEIGRIHM ruh kadei ban ailad lang iaki ban thoh iaki eksamin.
“Namar kane ka KSU, ka kyntu iaki bor ba khmih ban shimkhia halor kane bad ban pynthikna ba ki samla trai Jylla ki ioh ban thoh eksamin hala ka Jylla” la ong.
Nalor kane ka KSU ka pynpaw ruh baka NEIGRIHMS kadei ban pynlong hi iaki eksamin thep kam haka jaka ban aiwai sha kiwei ki Company namar kane ka lah ban wanrah ka jingle thoh iaki samla trai Jylla namar ki Company na bar kim da sngewthuh iaka jingsngew ki paidbah ka Jylla.
Ka KSU ka dawa ruh ban ailad shwa iaki samla trai Ri trai muluk naka bynta kino kino ki kam lada ki samla ki bit ki biang.
“Ka seng ka kyntu ban ailad shwa iaki samla ka Jylla ha kino kino ki jait kam lada ki samla ki bit ki biang ban shimti ia kum kita ki kam ba lait hapoh ka Hospital” ula ong.
