Shillong, Naitung 01: Ka Khasi Students’ Union (KSU) hynne ka sngi Baar, kala leit iakynduh ia u Myntri ka Sorkar Jylla u Bah Paul Lyngdoh ban shimkhia ha kaban tuklar ha kaba iadei bad ka jingpynrungkam bad ka jingbhah kam hapoh ka North Eastern Indira Gandhi Regional Institute of Health & Medical Sciences (NEIGRIHMS).
Haba iakren bad ki nongthoh khubor hadien ka jingialang, u General Secretary ka KSU u samla Donald V Thabah ula ong ba ka jingiakren kala pynleit jingmut halor ki mat kiba ym pat lah ban pynbeit wat hadien ba kala don ka jingiakhih ha katei ka jaka ai jingsuamr.
“Ngi lah iakynduh ia u Bah Paul Lyngdoh mynta ka sngi bad buddien ia ki mat kiba iadei bad ka NEIGRIHMS. Ka sorkar Meghalaya kham hashwa kala lum ia ka jingialang hapdeng ka seng bad ki heh ophisar jongka NEIGRIHMS, ha kaba la shim ia ka rai ba ka sorkar jylla bad ka NEIGRIHMS kin iasyllok lang bad ka tnad ka koit ka khiah jong ka Sorkar Pdeng” ong u Donald Thabah bad ka bynrap ba kan sa don shuh shuh ka jingiakren hapdeng ka KSU bad ki bor pyniaid ka NEIGRIHMS bad ia kane la khmih lynti ba kan sa slong noh shen.
Ula iathuh ruh ba ka KSU kala ioh khyndiat ia ka jingjop da kaba ioh sa 2 tylli ki seat pule na ka bynta ki samla riewlum ne Scheduled Tribe hapoh jongka kyrdan Economically Weaker Section (EWS). Hynrei ka seng kala dawa ba ia baroh ki kam thungkam dei ban buh shwa sharud tad haduh bad da pynurlong shwa ia ki mat jingdawa. Kine ki jingdawa ki kynthup ban pynneh pynsah ia ka rta ha kaba iadei bad ka kam Nursing Officer, ban pyntreikam ia ka bhah kaba 80:20 ki Nurse kynthei bad shynrang ha ka jingthungkam Nurse, ban pynbeit thymmai biang ha kaba iadei bad ka jingdon ia ka jingtbit ne Experience bad ban pynthikna ba ia ki eksamin ban thungkam dei ban pynlong hapoh ka jylla bad da ka Offline. Ka KSU kala dawa ruh na ka NEIGRIHMS ba kan pynlong hi ia ka eksamin thungkam kaba laitluid bad ban pyniar ia ka bhah thungkam ha ka kyrdan Group B.
“U Bah Paul ula pynthikna ia ngi ba yn sa rah ia kine ki mat bad ka Myntri ka koit ka khiah ka jylla ryngkat bad u Director ka NEIGRIHMS u Dr. Nalin Mehta bad kin sa shim ruh ia ki lad ban pynbeit ia ka jingialang bad u Myntri ka Sorkar Pdeng uba khmih ia ka koit ka khiah ban shim ia ka Resolution” la ong u Donald Thabah.
 hynne ka sngi Baar, kala leit iakynduh ia u Myntri ka Sorkar Jylla u Bah Paul Lyngdoh ban shimkhia ha kaban tuklar ha kaba iadei bad ka jingpynrungkam bad ka jingbhah kam hapoh ka North Eastern Indira Gandhi Regional Institute of Health & Medical Sciences (NEIGRIHMS).){kind=link}