Shillong, Nailur 15 :Ki Nongialam ka seng Khasi Students Union (KSU) hynne ka janmiet kila leit iakynduh ia ki Nongialam ka seng Hynniewtrep National Liberation Council (HNLC) kiba la wan sha Nongbah Shillong ban iashimbynta ha ka jingiakren iasuk bad ka Sorkar.
Ka HNLC kala phah haduh san ngut ki Nongialam ban wan sha ka miej iakren iasuk bad kine ki Nongialam kila don mynta la katto katne taiew ha Nongbah Shillong.
Kine ki Nongialam ka HNLC ki kynthup ia u u Vice Chairman ka seng Bah Mabhalang Jyrwa, Political Secretary Bah Aristerwell Thongni, Foreign Secretary Bah Phrangkupar Diengdohba ju khot sin u Bah Metal lem bad arngut ki PSO u Vice Chairman ba kynthup ia u Aiborlem Marbaniang bad u Bah Storgy Lyngdoh. La ioh jingtip ba kine ki Nongialam ka HNLC ki sah ha Inspection Bunglow kaba don ha Sumer.
Ki Nongialam ka KSU hapoh ka jingialam jong u President samla Lambokstar Marngar bad General Secretary samla Donald Thabah, kila iakynduh ia kine ki Nongialam ka HNLC bad iakren ia shibun ki kam ba iadei bad ki ishu jong ka Jaidbynriew.
Ha kane ka jingiakynduh la iadonlang ruh u ksiang jong ka HNLC Bah Sadon K Blah uba dei u President ka seng Hynniewtrep National Youth Front (HNYF).
“Ka jingthmu jong ka seng ban iakynduh ia ki nongialam ka HNLC, ka long ban ai mynsiem bad ban ai jingkyrshan iaka lynti kaba kila iaid khamtam haba da ki phew tylli ki snem kila iaid da ka lynti kiba kyllain, kiba khohruh khohram bad kiba bun ki jingdawa, kiba iasnoh bad kita ki pakit bad ka histori jong ka jaidbynriew” ong u samla Lambokstar.
“Ngi kwah ban ai mynsiem ia ki ba kin nym sngew blaw ne sngew kynjah ba kin iaid ha kata ka lynti katba dang pynkhreh ia kata ka jingiakren bad ngi kwah ban ai ka jingkular bad jingkyrshan lada ki donkam ha kano kano ka por iaka KSU baroh kawei ha kaba iadei bad ka jingpynkhreh iaka jingiakren iasuk bad ka sorkar jylla bad ka sorkar India” ula bynrap.
Haba kylli, kumno u sngew halor ka jingwan iakren iasuk ka HNLC, u samla Lambokstarwell u la ong, ka KSU kam kwah ban kren eiei than, namar ka HNLC ka sngewthuh khambha namar kala shah iaki jingtyrha la bun phew tylli ki snem, hynrei ka seng kan ka ai iaka kti kamon kti kadiang namar kidei hi ki paradoh parasnam kiba ieng naka bynta ka dawbah jong ka jaidbynriew ha kaba kila len lade bad bun ki khun samla kila kyllon ha ka jingialeh bapher bapher.
“Ka KSU ka sngewkmen ba mynta kila poi haka lynti ban iakren iasuk bad ngi ai ka jingkyrshan kaba pura ia ka rukom pyrkhat pyrdain ka jongki ba kin iaid shakhmat ha kane ka kam bad ngin don ha syndah ka jongki hapdeng ka jingpynkhreh ban iakren iasuk bad ka sorkar jylla bad ka sorkar India” ong u President ka KSU.
Halor ka jingkam jong kiba bun, ba lada ka urlong ka jingiakren iasuk hapdeng ka HNLC bad ka sorkar jylla bad sorkar pdeng kan wanrah syndon iaka jingsuk haka jylla, u nongialam ka KSU u la ong, “Teng teng kiba bun balang ki sngewthuh bakla bad kynnoh beit ba ka HNLC kadei ka daw jong ka jingshongsyier, ngim dei ban sngewthuh bakla ia kata, ka daw jongka jingshongsyier kam dei ka HNLC hynrei ka daw jong ka jingshongsyier kadei ki jingwan tuid jong ki mynder ri shapoh ka jylla jong ngi, kane kadei kaba shyrkhei tam namar ki wan ban knieh iaka hok, ka khaii ka pateng, ka synshar ka khaddar bad kumta ter ter”.
