Shillong, Nailar 21: Ka Khasi Student Union (KSU) West Jaintia Hills Unit kala phah tuklar haka Myntri ka koit ka khiah Kong Ampareen Lyngdoh halor ka jingdon ki briew kiba pyrshah ban tei ia ki Sub-Centre ha ki 5 tylli ki Shnong hapoh ka District.
Kine ki 5 tylli ki shnong kiba la ioh Sub-Center ki kynthup ia ka Mynksan, Madanrwan, Kyrwen, Ionglang bad ka shnong Niawkmai, kiba hap hapoh ka West Jaintia Hills.
Haba kren sha ki lad pathai khubor, u President ka KSU west Jaintia Hills samla Laitphar Syngkrem ula iathuh ba dang shen ka Sorkar Jylla kala mynjur ban ai mar kawei ka Sub-Centre sha kine ki 5 tylli ki shnong hynrei ki don pat ki riew shim kabu kiba kwah ban pynthut iaki kam ban pyntrei ia kine ki jaka sumar.
“Ngi la kyntu iaka Myntri ka tnat ka koit ka khiah ba kan tuklar halor kane namar ka jingdon ki Sub-Centre kan wanrah jingmyntoi haduh katta katta iaki nong shong shnong jong kine ki 5 tylli ki shnong” ong u samla Laitphar.
U Samla Laitphar ula pyntip baka Myntri ka tnat ka koit ka khiah kala bthah iaka KSU ban leit iakynduh ia Deputy Commissioner (DC) ka West Jaintia Hills ban pynbeit ia kita ki kynrum kynram kiba mih ha ki 5 tylli ki shnong.
Nalor kane, ka KSU West Jaintia Hills kala dawa ruh naka Myntri ka tnat ka koit ka khiah ban kyntiew kyrdan noh iaka Barato PHC sha ka CHC hynrei naka liang ka Myntri kala pynpaw ba iaka ba mynta, ym pat lah ban kyntiew kyrdan hynrei kala kular ban pynbit pynbiang iaki jingdonkam hapoh ka PHC ban pynjanai ia ka jingshakri iaki paidbah.
Ka KSU kala dawa ruh naka Myntri ka tnat ka koit ka khiah ban pynbha iaka surok bah ban poi shaka Namdong CHC bad haka juh ka por ban pynbiang iaki donkam ha kane ka jaka sumar.
