Nongpoh, Naiwieng 07 : Ka Khasi Students Union (KSU) Raid Nongtung Circle lem bad ki Nongialam ka North Khasi Hills, hynne ka sngi Ba-ar, kila iakynduh ia ka District Medical & Health Officer, Ri Bhoi District, ban ujor halor kiba bun ki jing duna bad ki jingdkoh ka rukom treikam jong ka Mawlasnai PHC.
Kane ka Kynhun Sengbhalang bala lamkhmat da u Education Secretary ka NKH Samla Banjop Mariang, kala pynpaw ba ki jingduna hapoh ka PHC ki long kiba bun bha bad kane kala ktah shikatdei eh ia ki paidbah jong ki Shnong bapher bapher ka thain kiba shaniah ban ioh ia ka jingshakri jong kane ka jaka sumar ka Sorkar ha ka pang ka shitom.
Ka KSU kala dawa ia ka DMHO Dr TS Momin ba kan tuklar lem mardor halor ki jingduna ba don ha kane ka jaka sumar ka Sorkar khnang ba ki paidbah ka thain kin nym mad jingeh haba donkam ia ka jingshakri jong kane ka jaka sumar.
Haba kren bad ki Nongthoh Khubor, u Samla Banjop Maring, u la iathuh ba ka seng kala ioh ia ka jingujor kiba bun na ki riew paidbah ka thain Mawlasnai bad kiwei kiwei halor ki jingbym biang ki jingshakri hapoh ka Mawlasnai PHC.
“Ngi la hiar jurip dang shen ia kane ka jaka sumar bad halor ki jingshem baroh, ngi la wan ban ujor noh sha ka khliehduh ka Tnad ka Koit ka Khiah ha ka District ba kan pynsngew sha ki bor kiba halor” ula ong.
Kat kum ka jingong jong u, ka jingdkoh ba hakhmat eh ha kane ka PHC ka dei ka jingduna palat ki doktor bad ki nongtrei, ka jingkhapngiah ka jaka sumar, ka jingbym biang ka umbam umdih bad kiwei kiwei.
Ula ong ba ka Sorkar kala dei ban kyntiew kyrdan noh ia ka Mawlasnai PHC sha ka CHC haba buh hakhmat ia ka jingdon jong ki paid nongshongshnong ka thain, khnang ba kane ka jaka sumar kan kham bit kham biang ha ki jingdonkam baroh ba kan lah ban shakri bha ia ki paidbah khamtam kito kiba wan na ki longiing kiba duk.
U pyntip ba shen ka seng kan sa leit iakynduh ruh ia ka Myntri ka Koit ka Khiah Kong Ampareen ban iakren halor kane ka kam.
