Shillong, Jymmang 30: Ka Khasi Student Union (KSU) South West Khasi, kala pan jingshai na ka Director of Health Services (MI) halor ka jingthungkam shipor ia palat 50 ngut ki briew ha Civil Hospital, Mawkyrwat khlem da pynbna paidbah ne khot Interview.
Kane ka Seng hapoh ka jingialam u President samla Forwardman Nongrem kala leit iakynduh ia ka Dr. F.V Kharshiing, DHS (MI) ban ioh ia ka jingshai halor kane ka kam.
Ka KSU ka la pynpaw ka jingsngewkhia halor kane ka thungkam thungjam khlem da iaid iaki kyndon ba la buh ha kaba ka la pynduh jingshaniah iaki samla thepkam thepjam napoh ka District.
“Ngi kyntu iaka ophis ba ka dei ban pynbeit halor kane ka bynta da kaba pyllait ia ka jingpynbna laitkam bad khot Interview khnang ba ki samla kin ioh iaka lad ban iakhun iaka interview. Ngi kyntu iaka sorkar ba ka dei ban phah noh ia baroh ki Post shaka DSC ne MPSC ym ban buhrieh hapoh ka Civil Hospital” la ong ka KSU.
Haba iadei bad kane ka Director of Health Services (MI) ka la kular haka seng ba kan bthah ia u District Medical and Health Officer ka South West Khasi Hills District ban pynbna paidbah iaki kam (Post) ba lait ha kane ka Hospital shaka DSC ne MPSC khnang ba kine ki tnad thungkam thungjam kin ioh ban thung pura noh iaki nongtrei da kaba pyndam noh iaki nongtrei kiba rung na kyrpong ing (backdoor appointment).
Nalor kane, ka KSU kala buh dorkhas ruh shaka Director halor kiwei ki mat ba kynthup ban ban pynbha bad maramot iaka Mawsynram PHC, ban pynsted ban pyntrei iaka Jyllep bad Mawhiang Sub Centre ia kaba la ioh jingmynjur bad jingiarap pisa naka PMABHIM, ban kyntiew iaka Ranikor CHC sha ka First Referral Unit (FRU) CHC da kaba pynbiang ruh ia u Pharmacist ba thikna bad ka X-Ray machine, bad ban pynsted haba iadei bad ka Paediatric Ward hapoh Civil Hospital Mawkyrwat.
 South West Khasi, kala pan jingshai na ka Director of Health Services (MI) halor ka jingthungkam shipor ia palat 50 ngut ki briew ha Civil Hospital, Mawkyrwat khlem da pynbna paidbah ne khot Interview.){kind=link}