Guwahati, Jymmang 31 : Ka Barak Valley kala shah ktah jur bha ha ka jingshlei um kaba la tap ia mar shiteng ka thain bad haduh 1.50 lak ngut ki briew kila shah ktah bad kila poi sah sha ki jaka rieh ba shipor.
U Myntri ka Tnad Water Resources Pijush Hazarika ula leit jngoh ia ka Cachar bad Karimganj bad peit pyrman ia ka jinglong ingman ka jingshlei um haba kular ruh ban ai ia baroh ki lad jingiarap.
Ha Karimganj Districy, kumba 38,000 ngut ki briew kynthup ia 10,000 ngut ki Khynnah na ki 100 tylli ki Shnong kila shah ktah jur ha ka jingshlei um. Ha Cachar District, palat 1 lak ngut ki briew kila shah ktah.
Haba iakren bad ki nongthoh khubor, u Pijush ula ong “Kiba bun ki rud wah kila shlei um namar ka jingkiew ka um ha baroh ki wah. Kito ki briew kiba shah ktah ha ka jingshlei um kin sa ioh ia ki jingiarap”.
“Nga la leit jngoh ia kiba bun ki jaka. Ha kine ki saw sngi ka Karimganj kala ioh ia u slap ba 50 mm, kaba dei kaba jur tam. Ha ka shisnem, ka Karimganj ka ju ioh tang 50 mm u slap hynrei tang ha kine ki 4 sngi kala pynkhein ia ka record” ong u Pijush.
U MLA ka Patharkandi Krishenendu Paulula ong “Namar ka jingiai bteng ka jinghap slep ha Mizoram, ka wah Longai kala shlei um bad baroh ka shnong Patharkandi kala shah ktah. San tylli ki Dykes kila shah tap ha ka um bad kumba 50-60 hajar ngut ki briew kila shah ktah ha ka constituency jong u”.
U District Commissioner ka Karimganj Mridul Yadav ula bthah ia ki nongtong dohkha bad ki paidbah ba sah harud ka wah Singla ba kim dei shuh ban tur sha wah.
