Shillong, Nailar 03 : Ka Jaintia Students Union, Seng Kmie ha ka sngi Palei, ka la iakynduh ia ka Myntri Kong Ampareen Lyngdoh ban pyntip ba ka MPSC kala khang ia ka jaka pynialeh eksam thungkam ha Jowai khlem kano kano ka daw haba kyntu pat ba kan tuklar khnang ban lah plie biang ia ka.
Ka JSU kala pynpaw ba kane ka jingkhang ia ka jaka pynialeh eksam thungkam jong ka MPSC kala pynbitar bha ia ki paid bah Jaintia khamtam ki samla wad kam jong ka thain.
Ha ka dorkhas bala aiti sha ka Myntri, ka JSU kala dawa jur ia ka Sorkar Jylla ba kan plie biang ia kane ka centre ka ban pynsuk ia ki samla wadkam na ka thain.
Ka JSU kala ong ba da ka jingdon kane ka centre ha Jowai, kala iarap shikatdei eh ia ki samla wadkam ha kaba kila lait na ka jingpynlut pisa ban wan shaduh Shillong ban ialeh ia ka eksam.
Ka JSU kala dawa ruh ia ka Sorkar ban shimkhia mardor halor kane ka kam.
Na ka liang ka Myntri kala kular ia ka JSU ba kan sa rah iakren ia kane ka kam bad u Myntri Rangbah ka Jylla shuwa ban shim ia kano kano ka rai.
