Shillong, Nailar 18 : Ka Hynniewtrep Border Disputed Redressal Forum (HBDRF) ha ka sngi Saitjain, kala iakynduh ia u MP ka Shillong Parliamentary constituency Dr R.J Syngkon, bad aiti ia ka dorkhas ba un kren lem ha Parliament halor ka jingpynphai noh ia ka Block-I (Elala Labang Nongphyllut bad Pangam Raliang) sha Meghalaya.
Ka HBDRF kala iakynduh ia une u MP ha Saint Clareth Parish Hall, Phramer, West Jaintia Hills District haba pynpaw ruh ia ka jingartatien ba ka jingiakren pynbeit pud hapdeng ka Meghalaya bad Assam kan poi sha ka thong ban pynphai ia ka Block-I sha Meghalaya.
Ha kane ka dorkhas, ka Forum kala kren shaphang ka jinglong trai man trai jong ki Khasi Pnar ia ka Elaka Labang Nongphyllut bad Pangam Raliang (Block-I) na ki khana pateng bad ki jingthoh jingtar ne ki historical fact.
Kat kum ka kyrwoh bala phah da u Chairman Bah Chandame Sungoh, “Ka Forum ka pynpaw ia ka jingsngewsih halor ka jingleh donbor ka Sorkar Assam ha ka por ba thaw ia ki District Council na ka bynta ki riewlum ka Jylla Assam ha u snem 1949-50 da kaba khlad bad pyniasoh jubor ia ka Elaka Labang Nongphyllut bad Pangam Raliang (Block-I) sha ka United Cachar & Mikir Hills ha ka jaka ban don bad ka United Khasi Jaintia Hills District Council kumba ju long naduh kulong kumah”.
Une u Nongialam ka HBDRF ula pynsngew ia ki jingshah lehbein shah thombor ki paid Khasi Pnar jong kane ka thain naduh ba kila shah pynhap jubor sha Karbi Anglong Assam.
Ula ong ba kala don ruh ka Notification kaba ka Sorkar Assam kala kubur ba kala leh bakla halor ka jingpynhap jubor ia kane ka Elaka sha ka United Cachar Mikir Hills bad kumjuh ruh ka shithi bala phah sha ki District Council- ka United Khasi & Jaintia Hills bad ka United Cachar Mikir Hills ba kin shimkhia ha kaban pynbeit ne pyndep ia ka kam ban pynphai biang ia kane ka Block-I sha ka United Khasi Jaintia Hills District.
Ha kajuh ka por, ka Forum kala pynpaw ia ka jingartatien ba ka jingiakren pynbeit pud hapdeng ka Meghalaya bad Assam, kan pynioh ia ka hok ne pynphai biang ia ka Block-I sha Meghalaya.
“Ngi kyrpad ia phi (MP) ban shimkhia bad kren lem ia kane ka kam ha Parliament bad ruh bad ki Heh Sorkar ha Delhi ban pynthikna ba kan ym don kano kano ka jingleh shiliang lane jingleh arsap haba pynbeit ia u pud u sam” ula ong.
U pyntip ba u MP ula ai ka jingkular ba un shimkhia ia kane ka kam bad ba un sa leh ia kaba donkam.
 sha ka United Cachar & Mikir Hills ha ka jaka ban don bad ka United Khasi Jaintia Hills District Council kumba ju long naduh kulong kumah”.){kind=link}