Shillong, Jylliew 26: Ka Hynñiewtrep Border Dispute Redressal Forum (HBDRF), ka Labang Nongphyllud Pangam Raliang committee ha ryngkat ka jingdon lang u MDC bah Aibor Shadap hynne ka sngi Nyngkong, ki la iakynduh ia u Myntri Rangbah Conrad K Sangma bad dawa ba un iasaid tyngeh bad ka Sorkar Assam ba kan pynphai biang iaki 36 tylli ki shnong kiba don ha Block 1 sha Meghalaya.
Haba kren sha ki lad pathai khubor u chairman ka HBDRF u bah Chandame Sungoh ula iathuh ba ha ka jingiakynduh bad u Myntri Rangbah, ki nongialam na ki 36 tylli ki shnong na Block 1 ki la dawa baka sorkar Meghalaya kam dei ban iasoi iaka MoU pynbeit pud jong ka wat ba ar lada ka sorkar Assam kam treh ban pynphai biang iaki shnong Khasi-Pnar.
U bah Chandame ula iathuh ba u Myntri Rangbah ula buh jingkylli iaki nongialam, hato kine ki 36 tylli ki shnong Khasi-Pnar ki don ne em haka thup jong ka kaiphod bala pynkhreh daka sorkar Meghalaya ha u snem 2011.
Ula iathuh ba u Myntri Rangbah ula kyntu iaki nongialam shnong ka thain Block 1 ban pule bniah iaka kaiphod jong ka sorkar Meghalaya 2011 bad ula kyntu ruh iaki ban pynbiang iaki kot ki sla haba iadei bad ka jinglong trai iaka khyndew ka shyiap khnang ban long kiba la pynkhreh hadien ba la sdang ka jingiakren pynbeit pud Phase II bad ka sorkar Assam.
“U Myntri Rangbah ula kyntu ia ngi ban long kiba la pynkhreh bad ban don bynta lang bad ka sorkar jylla, ka Regional Committee haka por leit jurip iaki shnong ki thaw bad ka sorkar Assam khnang ba ka jingiakren pynbeit pud kan long kaba iaid beit iaid ryntih” ong u bah Chandame.
Naka liang u MDC u bah Aibor Shadap ula ong baka thaiñ Block-1 ka dei hi ka bynta jong ka Meghalaya ha ka por ba dang ioh ia ka Jowai Civil Sub-Division hynrei tang kumba katto katne por la kynriah shaka Mikir Hills bad North Cachar Hill district bad mynta la 70 snem tam ki shnong Khasi-Pnar ki la don sha ka District Karbi Anglong.
U bah Aibor ula ong ba ki 36 tylli ki shnong Khasi-Pnar ki ba don ha kitei ki thain, ki la mad shibun ki jingeh ha kine ki sngi namar ka jingshah pynwit bad shah khang lynti ha ki paid Karbi .
Ula ong ba ba ki nongshong shnong ha kitei ki jaka ki dei tang ki Khasi-Pnar suda ha kaba ka kheink ur khein jait, ka riti dustur, ka ktien ka thylliej bad nadong shadong hi ka dang na ka rukom khein ki Khasi-Pnar.
Pule ruh: Rai ka KHADC ban dawa pynkiew noh ia ka bhah khajna na ka jingkhaii dewiong
, ka Labang Nongphyllud Pangam Raliang committee ha ryngkat ka jingdon lang u MDC bah Aibor Shadap hynne ka sngi Nyngkong, ki la iakynduh ia u Myntri Rangbah Conrad K Sangma bad dawa ba un iasaid tyngeh bad ka Sorkar Assam ba kan pynphai biang iaki 36 tylli ki shnong kiba don ha Block 1 sha Meghalaya.){kind=link}