Shillong, Risaw 29: U Dr Kestonbel Manik Syiemlieh, President ka Federation of Khasi States ha ryngkat ka kynhun na ka Federation, ki la leit ban ia kynduh ia u Lat ka Jylla CH Vijayashankar ha Raj Bhavan Shillong haka sngi Ba-ar.
Ha kane ka jingiakynduh, ka Federation ka la iakren ia shibun ki mat kiba iadei bad ka bha ka miat bad ka roi ka par jong ki trai ri trai muluk Khasi, bad kumjuh ruh ia ki mat kiba iadei bad ki rukom synshar tynrai jong ki Khasi States.
U Dr. Syiemlieh u la batai lyngkot ha u Lat halor ka histori bad ka kolshor jong ki Khasi States bad ka bynta jong ki ban pynneh pynsah ïa ki pateng kiba riewspah jong kane ka thaiñ.
U Lat u la iaroh ia ka jingtrei shitom jong ka Federation ha kaba kyntiew bad iada ia ki riti, ki dustur jong ka jaidbynriew Khasi bad u la ban jur ia ka jingdonkam ban pynneh pynsah ia ka jingstad tynrai ha kane ka juk kaba mynta.
U Lat u la pynpaw biang ia ka jingdonkam ban iatreilang hapdeng ki It ki Hima bad ka Sorkar Jylla ban pynthikna ia ka jingkiew ha ka imlang sahlang jong ki nongshong shnong.
U Dr Syiemlieh bad ka kynhun, ki la ai khublei ïa u Lat halor ka jingkyrshan bad jingithuh ïa ki kam jong ka Federation bad ki la pynpaw ïa ka jingangnud jong ki ban bteng ha ka ban noh synñiang sha ka roi ka par jong ka Jylla bad ki paidbah baroh lang.
