Shillong, Nailar 04 : U Myntri Rangbah ka Jylla Conrad K Sangma ula iakren bad u Myntri Rangbah ka Assam Himanta Biswa Sarma halor ka jingkynnoh thombor jong ka seng kiengatiar thymmai ki Karbi-ka United Peoples’s Fromt of Karbi Anlong (UPFKL) pyrshah ia ki paid Khasi-Pnar ha Block-I.
“Nga la iakren bad u Myntri Rangbah ka Assam bad ula kular ban shimkhia bha ia kane ka kam” ong u Conrad haba iakren bad ki nongthoh khubor.
“Katba ngi dang iakren, ka Sorkar Assam kala shong ia bun ki jingialang halor ki jingjia bad ki kam kiba jia ha ki jaka khappud” ula ong haba pyntip ba un sa iakren biang bad u Myntri Rangbah ka Assam ha kane hi ka janmiet.
Nalor kane, u Conrad ula pyntip ba ka jingiajurup lang ia ka jaka khappud da ki arngut ki Myntri Rangbah ki ar Jylla kan sa long hadien ka 15 tarik u Nailar.
“Tang ban shu pyntip ia phi ba ha kine ki saw sngi bala leit, ngi la iakren la paalt 10 sien lyngba ka phone bad namar ki katti katne ki kam, ngim shym la lah ban leit jurip ha kine ki khyndiat sngi bala leit hynrei ngin pyrshang ban leit jurip ia ki jaka khappud hadien ka 15 tarik Nailar” ula ong.
“Ia mynta, ki kam kila mih ha kine ki jaka khappud, ngi dang pyrshang ban iakren pynbeit iaki” ula ong.
Halor ka jingkynnoh pynieng khyrdop beain ka KAAC ha Khanduli, West Jaintia Hills, u Conrad ula ong ba ia kane ka kam yn sa pynbeit noh hapoh kane ka taiew ba mynta.
U pyntip ba ia kane ka lam la pyntip ruh sha u Nongialam sain pyrthei ka thain bad ki paidbah jong ka thain Khanduli.
“Nga la iakren ruh ia kane ka kam bad u Myntri Rangbah ka Assam bad nga kyrmen ban gin sa lah ban pynbeit noh ia ka hapoh kane ka taiew hi” ula ong.
