Shillong, Jylliew 04 : U Myntri Rangbah ka Jylla Conrad K Sangma ha ka sngi Balang ula iathuh ba ka Sorkar Jylla kala iakren mynta bad ka Sorkar Assam ban iapynbeit biang ia ki shnong, kiba jah na ka kaiphod 2012 bala aiti da ka Jylla halor ki 12 tylli ki jaka ba don jingiakajia.
Haba iakren bad ki nongthoh khubor, u Conrad ula ong ba ia kane ka kam la iakren ha ka jingialang ba dang shen hapdeng ki Myntri Rangbah ba iakren ia ki kam iapynbeit pud, kaba long ha Guwahati.
U Conrad ula pyntip ba ki don ki jaka kiba hap hapoh ka Tarabari Sector-ka Malangsalbari bad ki shnong ba marjan, ki bym shym la kynthup ha ka kaiphod 2012 bala aiti da ka Sorkar Meghalaya sha ka Sorkar Assam halor ka jingkam trai ia ki 12 tylli ki jaka ba don jingiakajia.
“Hynrei nga dei ban ong ba ha ka kaiphod 2012 la jer ia ka kyrteng Malangsalbari hynrei ha ka map bala shna bad aiti ha ka kaiphod, ka Malangsalbari kala paw ba ka hap ha Assam ym ba ka don hapdeng ka jingiakajia pud. Kane kala pynsyllang bha ia ngi ha ka por ba ngi iashong ha u snem 2019-2020 namar ngi la iaid kat kum ka kaiphod 2012. Kane ka jingeh kala mih biang ha ka jingiakren namar ha ka kaiphod, la pyni baka Malangsalbari ka hap ha Assam bad kynsan kynsan ki briew kila wan bad ong ba ngi kwah ban hap sha Meghalaya” ong u Conrad.
“Ngam kwah ban ong eiei palat ia kane mynta namar ngi dang iakren haba iadei bad kane ka thain” ula ong.
Haba iadei bad ka thain Malangjoipur, u Conrad ula ong “Hangne ruh ka don kawei ka Shnong, ngi dang iapynbeit ia kane ruh, ka Huhuapara ruh kala mih. Ki jingiakren kila iaid mynta bad aipor ia ngi ba ngin iakren pynbeit”.
Haba iakdei bad ka thain Pilangkata bad Maikhuli, u Conrad ula ong “Baroh kine ki jaka, ngi dang iakren bad ki trai shnong, ngi dang iakren ia ki bor pyniaid District. Ki don ki jingiabatai kiba iapher halor ka MoU da ka Assam bad ka Meghalaya”.
Ula ong, ban kiar ia kino kino ki jyrwit jyrwat, ka Sorkar kala bthah ia ki Deputy Commissioner na baroh arliang ba kin iashong bad pynkhreh ia ki jingdonkam nadong hadong bad hadien ki Chairman jong ki Regional Committee kin sa iashong ban iapynbeit bad khatduh ka jingialang ki CM kan sa long bad ngin sa lah ban shim rai ia u pud jong ka Pilangkata bad Maikhuli.
“Hynrei ia ka Tarabari, Gizang, Hahim, Bhaklapara, nga kyrmen ba ngin lah ban pruid dak noh ia u pud u sam bad ban pynieng ia u mawpud hashuwa lane ha ka 15 tarik Nailar” ula ong.
