Shillong, Nailur 24 : Ka Deputy Commissioner ka South West Garo Hills Hema Nayak kala pynmih ia ka hukum ba ka Ophis ka Deputy Commissioner kan nym ai satia ia kano kano ka jigbit ban pynlong ia ki jingiakop khwai, fete, mela bad ki tamasa hapoh ka district khlem da ioh ia ka No Objection Certificate (NoC) na ka tnad Taxation.
Ka hukum ka ong ba ka Ophis kala ioh jingtip ia ka jingpynlong ia ki jingiakop khwai dohkha bad kiwei kiwei khlem ka jingbit na ka Ophis ka DC bad NoC na ka Tnad Taxation.
La ong ba ka jingpynlong ia kum kine ki tamasa ki dei kiba hap ban siew ia ka khajna hapoh ka GST hashuwa ban pan jingbit na ki bor District.
Kala ong ba ka jingpynlong ia kine ki jingiakop ne tamasa khlem ka jingbit bad NoC yn khein ia ki kum ki kam beain bad yn ym ai jingbit ruh khlem da ai lang ia ka NoC na ka Tnad Taxation.
Kumta, kala bthah ba kino kino ki kyndon ne seng kiba kwah ban pynlong ia kine ki jingiakop hapoh u pud u samka District, kin hap ban ioh jingbit beit thik tang na ka DC marwei bad ban don ruh ia ka NoC na u Commissioner of Tax, Meghalaya Shillong bad Superintendent of Taxes, Tura.
Kiwei kiwei pat ki kot ki sla ba donkam ki kynthup ia ka Clearance Certificate na u Superintendent of Police ka District, NoC na u Executive Engineer, PWD (Roads), na ki Nokma/Sordar, ka NoC na ki trai pung lada dei ki pung shimet bad kiwei kiwei.
