Guwahati, Ïaiong 01: Katba ka Jylla Assam ka dang pynkhreh ia ka Assembly Elekshon, hynrei haba peit ia ka jinglong jingman jong ki kyrtong kiba iakhun ia ka elekshon la shem ba ki don bun ngut kiba donkti ha ki kam sniew.
Katkum ka jinglap jongka Association for Democratic Reforms and Assam Election Watch kala pyni ba na ki 722 ngut ki kyrtong kiba la mih ban iakhun ia ka elekshon mynta u snem, kila don 102 ngut ki kyrtong ne 14% kiba la pynbna ba kila don ka kam sniew pyrshah ia ki.
Na kine, 82 ngut ki kyrtong ne 11% kila mad ia ka jingshah kynnoh ha ki kam sniew kiba eh bha, kaba kynthup ia ka jingleh ia ki kam kiba lah ban shah pynshitom da kaba shah set phatok palat ia ka 5 snem.
Kane ka jingdon ki kyrtong ha ki kam sniew kala nang hiar haba ianujor bad ka elekshon ha u snem 2021, hynrei ka dur kaba iar hi kam shim la kylla namar kam dei shuh tang ka mat ba katno ngut ki kyrtong ki don ia ki Case pyrshah ia ki hynrei mano ba la pynieng pat ia ki.
Jan man la ki seng sain pyrthei, ki don ia ki kyrtong kiba don ia ki kam sniew hynrei ki bteng pat ban ioh jaka.
Hapdeng jong ki seng kiba heh, 37% na ki kyrtong ka seng AIUDF bad 28% na ka seng Congress, 9% na ka seng BJP kila pynbna ia ka jingdon case pyrshah ia ki ha ki kam sniew bad wat ki seng riewlum kila mad ia kane kajuh hi ka rukom, kaba pyni ia ka jinglong jingman ha ka kam sain pyrthei ha Assam.
Kila don ruh ki kyrtong kiba la mad ha ki kam sniew ne runar kiba eh, ha kaba 8 ngut kila shah kynnoh ba kila donkti ha ki kam kiba iadonbynta bad ka jingpyniap briew katba 9 ngut kila shah kynnoh ba kila donkti ha kaban pyrshang ban shim ia ka jingim briew.
Kine kim dei satia ki jingjia kiba rit hynrei kidei ki jingkynnoh kiba shyrkhei kaba la pynmih ruh ia ki jingkylli na kiba bun balang halor ka rukom jied ia ki kyrtong ban iakhun ia ka elekshon.
Wat hapdeng ka jingbthah kaba la bunsien na ka Supreme Court ia ki seng sain pyrthei ban ai ka jingpynshai ne jingpynskhem balei ki jied ia ki kyrtong kiba leh ia ki kam sniew, hynrei ki seng sain pyrthei ki iai bteng ban shaniah ban ai jingpynshai ba kidei kiba pawnam, kiba trei ia ki kam na ka bynta ka imlang sahlang ne kam ruh ba ki jingkynnoh kidei tang ki kam politik.
Kumba ka long, kane ka jingkylla kala long kaba rit bha hynrei ka jingsngewkhia kala nang jur ha ki katto katne ki constituency.
Kumba 8 tylli ki constituency ha Assam ki hap ha ka kyrdan ‘Red Alert’ ha kaba palat 3 ngut ki kyrtong kiba iakhun ia ka elekshon kila pynbna ialade halor ki Case kiba la shah pynngat.
Ha kine ki jaka, ki nongthep vote kila shah ieh ym ha kaban jied ia ki kyrtong kiba khuid hynrei hapdeng ka kyrdan jong ki jingkynrum kynram.
Nalor kane ka mat, jan kumba 39% ki kyrtong kidei kiba don da ka Klur Tyngka, kaba pyni ruh ia ka bor jong ka jingdon ia ka pisa ha ka elekshon.
Kumta jan man iwei na ka hynniew ngut, kidei kiba mad ia ki jingshah kynnoh ha ki kam sniew, kam paw shuh ba kadei tang ka jingaidaw hynrei kala i kumba mynta kala kylla long syndon kum ka rukom treikam.
