Nongpoh, Lber 04: Ki kynhun Sengbhalang ka Ri-Bhoi District hynne ka sngi Nyngkong, kila pynlong ia ka jingiakhih da kaba iashong kyllain mungor hakhmat ka Indoor Stadium, Umlyngkdait ban pynbor ia ka Ophis u Deputy Commissioner ba kan pynbna noh ia ka result thungkam jong ka District Selection Committee bala pynialeh eksam naduh u 2021-22.
Kine ki Sengbhalang kiba pynlong jingiakhih ki dei ka Ri-Bhoi People’s Council bad ka MPSO, Ri-Bhoi District bad la kyrshan ruh ia ka da kiwei pat ki sengbhalang ba kynthup ia ka CoRP, HANM, ka Synjuk ki Seng Samla Shnong ryngkat ki Nongialam ka Ri-Bhoi Dorbar bad kiwei kiwei.
Kane ka jingiashong kyllain mungor kala sdang naduh ka por 11 baje mynstep haduh ka por 3 baje janmiet.
U President ka RBPC Samla Jayson Lennox Nongrum u la ong ba kum ka seng baroh shi katta kala ïaid da ka lynti kaba jai jai lyngba ka miej jingïakren bad mynta ka sngi ruh kum ka seng kala shim da ka lynti ïakhih kaba jai jai ban shong kyllaiñ mungor, hynrei lada ka sorkar kam kheiñ snep ne kheiñ kor ïaka jingjai jai, ka seng kala pynkhreh da kiwei ki lynti kiba kham tyngeh nangne shakhmat bad ka sorkar ka dei ban shim ïaka jingkithlieh.
Kiwei kiwei ki nongkren ba kynthup ia u Bah RR Makdoh Adviser ka Ri-Bhoi Dorbar, Bah Pateng Marsing Working President ka CoRP, Bah Aristone M Ryndongsngi President SSSS, kila ai ka jingkyrshan ïaka seng RBPC kaba la lamkhmat ïa katei ka jingïakhih ban dawa naka sorkar ba kadei ban pynlait mardor ïaka Result DSC kaba ki khun samla kila ap khmih lynti baroh shi katta.
Ki la ong ruh ba ka sorkar kala dei ban shimkhia ban pynbna ïaka Result ym ban shu aidaw ïaka Reservation Rooster kaba ki tnad sorkar kila dep ruh ban ioh ïaki jinghikai ne ki training bapher bapher.
Kila kyrpad ia ka sorkar ba dei ban shimkhia ha ka ban pynlait noh ïaka result DSC ym ban ap haduh ban da mih ki jingïakhih bad ki jingïakulmar.
