Iakhih ki Meitei ha Shillong ba hiar thma ki kaikhlaw Kuki da ki drone ha Manipur

Shillong, Nailur 15: Da ka jingsngewlem ia ki jaidbynriew Meitei ha ka jylla Manipur, kiba la mad ia ka jingduh kaba khraw namar ka jingiaumsnam, ka Manipuri Elders’ Consortium Shillong (MECS) kala pynlong ia ka jingiakhih ha ka sngi u Blei, ha kaba kala pynrem jur ia ka jingpyndonkam da ki drone bad ki tiar pynbthei ha kaban thombor ia ki bor ai jingiada bad ia ki nongshong shnong ka Manipur.

Ia kane ka jingiakhih la pynlong ha Manipuri Rajbari ha Shillong, ha kaba ki paidbah kila rah ia ki jingthoh kiba don ia ki kyrwoh kum ka “Pynneh biang ia ka Internet ha Imphal ” bad “Sangeh ka jingpyniap ia ki Meitei kiba lui lui.”

U President ka MECS u N. Munish Singh, ula banjur ia ka jingdonkam kyrkieh ba ka sorkar pdeng kan pynthikna ban ai jingshngain ia ki paidbah kiba sah ha ki shnong ha nongkyndong. Kane ka jaidbynriew ka don ruh ia ka jingthmu ban phah da ka jingthoh sha ka sorkar pdeng ban tuklar mardor bad ban kyrshan ia ki paidbah kiba la mad ia ka jingeh.

Katei ka jingiakhih kadei hadien ba kala mih ka jingiakynad ha Manipur kaba la jam mynta sha ka bnai kaba 16, ha kaba la duh ia ka jingim jong ki 250 ngut ki briew, bun bah kiba la mynsaw bad palat 60,000 ngut ki briew kila hap ban kynriah ia ka jaka sah ka jongki.

U Singh ula kyntu ia ka sorkar ban shim mardor ia ki sienjam ban wanrah biang ia ka shongsuk ha Manipur.

Ka sorkar Manipur kala pynjari iaka jingkhang ia ka Internet hadien ba kala mih biang ka jingiakhih bad la pynjari ruh ia ka korphiw ha ki katto katne ki district.