Shillong, September 15 : Ki bahaiing hasem bad ki paidbah hynne ka sngi U Blei, kila leit tep don burom ia u Chief Executive Member (CEM) barim bad MDC jong ka Nongthymmai Constituency Bah Laitphlang Kharkongor ha u lum jingtep ka Balang Presbyterian Nongthymmai ha Mawblei.
U Bah Latiplang Kharkongor ula khlad noh ha ka 12 tarik u Nailur ha Shillong Civil Hospital hadien ba ula shah ban lah slem ha ka jingpang kaba u don.
U Bah Latiplang ula shah jied 4 sien lynter kum u MDC ka Khasi Hills Autonomous District Council (KHADC) naduh u snem 2004 bad ula shah jied ruh kum u Chief Executive Member (CEM) ka KHADC naduh ka 22 tarik u Naiwieng 2019 haduh ka 20 tarik u Lber 2020.
Watla ula long u MDC uba khlem seng hynrei u Bah Latiplang namar ka jingioh jingshaniah na ki MDC ula ioh ban ialam kum u CEM ka KHADC da kaba pynkhyllem ia ka Executive Committee kaba la ialam da u Bah Teinwell Dkhar na ka seng UDP hapoh ka kynhun United Democratic Alliance (UDA).
Kum ban shu pynkynmaw u Bah Teinwell Dkhar uba long u MDC ka Shella, ula khlad noh ha ka 26 tarik u Jylliew hadien ba ym shim la don ha ka met kaba koit ba khiah. Kumba long u Bah Latiplang, u Bah Teinwell ruh ula jop ia ka elekshon MDC naduh u snem 2004.
