Shillong, July 12: Ki nongialam bad ki dkhot jongka Meghalaya Pradesh Congress Committee (MPCC) hynne ka sngi balang kila pynlong ia ka jingiakhih kaba jar jar ban pynpaw iaka jingsngewlem ia u nongialam ka seng Congress u Rahul Gandhi halor ka jingshah rai pynrem bad shah pynduh iaka jinglong dkhot kum u MP ka Lok Sabha.
Ki nongialam ka MPCC kiba kynthup ia ki MLA bad MDC kila ialum ha ka ophis treikam jong ka MPCC ha Congress Bhawan, Shillong ban iashimbynta ha katei ka jingiakhih.
La pynlong ia ka jingiakhih tang hadien katto katne sngi, ba ka seng Congress kala pynbna ban leit ujor sha ka Supreme Court hadien ba ka Gujarat High Court kala kyntait ban pynsangeh iaka rai pynrem ia u Rahul Gandhi bala pynmih hukum ha u snem 2019 kaba iadei bad ka jingkren kynthoh iaka jait Modi.
U nongialam ka CLP bad MLA ka Mylliem u Bah Ronnie V Lyngdoh ula ong, ba ka jingthmu jong ka jingiakhih ba jar jar ka long ban pyrshah jur ia ka jingleh jong ka sorkar pyrshah ia u nongialam ka Congress u Rahul Gandhi.
Na ka liang u MLA ka BJP u Purnesh Modi, uba long u nongujor mukotduma pyrshah ia u Rahul Gandhi, ula ujor da ka Caveat ha ka Supreme Court ha ka sngi Balang ba kyntu ban pdiang ia ka jingujor jong u Rahul Gandhi pyrshah ia ka rai jong ka High Court ba kyntait ban pynsangeh ia ka rai pynshitom halor ka mukotduma ba kynthoh ia ka jait Modi.
Ka Single Judge Bench jong ka Gujarat High Court ha ka 7 tarik u Naitung kala kyntait ia ka jingkyrpad u Rahul Gandhi ban pynsangeh ia ka hukum kaba iadei bad ka mukotduma bai mynrain khmat.
Katkum ka Website jongka Supreme Court, u Purnesh Modi ula ujor da ka Caveat ha Supreme Court ha kajuh ka sngi lyngba u nongiasaid ain P S Sudheer.
Pule lang ia kane: Pynjari kyndon 144 CrPC u DC ba mana ban iatur shajan ki karkhana coke ba be-ain
