Nongstoiñ, 6 Naiwieng: Ka jingpyntrei ïa ka surok Nongstoiñ-Rambrai-Kyrshai-Chaygoan ïa ka bynta kaba nyngkong (phase 1) ïa kaba la pyntrei da ka Kompani Spaica na Jharkhand kala ïaid shait shait mynta khamtam ha kaba ïadei bad ka jingpynheh ïa ka surok ban ot bad puh ïa ki lum ki wah.
U bah Robertson Bamon u ba dei u Site Engineer ka NHIDCL u la ïathuh ba ka jingot bad puh ïa ki lum na ka bynta ban pynheh ïa ka surok kala dep kumba 75 na ka 100 bad mynta ka sah satang ha ki katto katne tylli ki bynta hapoh ki shnong ha sor Nongstoiñ ban pyndep.
U la iathuh ruh ba la khmih lynti ba la kumno kumno ha u snem ban wan yn ïoh sdang noh ban siang maw bad siang rong ha ki katto katne tylli ki bynta jong katei ka surok bad u la ïathuh ruh ba nalor ka jingpyntrei surok katei ka Kompani ka ïarap ruh ha kiba bun ki jingdonkam jong ki shnong ki thaw.
Nalor ka jingshna surok, kane ka Kompani kala ïarap ruh ban pyntheh khyndew hapoh ka Madan shnong Tiehsaw bad ban shna pynbha ruh ïa katei ka madan khlem kano kano ka jingsiew nalor kiwei kiwei de ki kam ïarap da katei ka Kompani.
Ka Dorbar Shnong Tiehsaw kala pynpaw ïa ka jingsngewkmen bad sngewnguh ïa ka katei ka Kompani kaba nalor ka jingpyntrei ïa ka surok kala leh ruh ïa ki kam ba bha na ka bynta ki shnong ki thaw.
U Sordar ka shnong Tiehsaw bah M. Dkhar u la ong ba lada ka shnong ka pyntrei hi ïa katei ka Madan, ka jinglut kan kot palat 30 lak tyngka hynrei lyngba ka jingïarap lang katei ka Kompani kaba pyntrei surok, kala long ka jingkyrkhu ïa ka shnong ka thaw baroh kawei.
U bah Dkhar u la kyntu ruh ïa ki khun ka shnong ba kin ai ka jingïatreilang bad katei ka Kompani khnang ba katei ka project shna surok kan long kaba ïaid beit ïaid ryntih bad ba kan nymdon kano kano ka jingpynthut ïa ka shongsuk shong shngaiñ jong ki nongtrei katei ka Kompani.
“Ngi la sakhi lyngba ki lad pathai khubor ba haba ki Kompani ba na bar ki wan ban pyntrei ïa kino kino ki project ha kane ka Jylla ki don kiba shah pyndik, shah byrngem bad shah thang ki kali bad kumta ter ter hynrei kane ka jingleh sniew kan wanrah pyndban ka jingduhnong ïa ngi hi bad kan long kumba ngi leh beiñ ïalajong” u la ong.
Ha kawei pat ka liang u bah M. Dkhar u la pynpaw ruh ka jingsngewnguh kaba khraw ïa u MLA ka Nongstoiñ u bah Macmillan Byrsat u bala ïakhun ban pynneh ïa kane ka surok naduh ka 0KM haduh 5 KM kaba la don ka jingpynkynriah ban lait noh na kane ka surok bah ar lain kaba ïaid lyngba ki saw tylli ki shnong hapoh ka sor Nongstoiñ.
