Shillong, Iaiong 29 : Ki samla pule ka North Eastern Hill University (NEHU) ha ka sngi Ba-ar kila pynlong ia ka rally bad sdang ruh ia ka signature campaign pyrshah ia ka jingkem ba dang shen ia u President ka NEHUSU Sandy Sohtun bad ka jingwanrah ia ki Pulit ba kiengatiar hapoh ka phyllaw jong ka University.
“Ngi ieng pyrshah ia ka jingwan ki Pulit kiengatiar beain hapoh ki jaka pule, khamtam haba pyndonkam ia ki ban tehkama ne pyntieng ia ki kynhun ba don bynta”, “Ka jingwanrah ia ki bor pahara ba kiengatiar ha ki University da ka nam ba khlem nongrim ka buh ha ka jingma ia ka jingshngain bad ka jinglong laitluid ki jaka pule” bad “Ngi ieng skhem ban pyrshah ia ka jingpyndonkam bakla ia ka bor da ki briew ka ain ha ka dur jong ka jingkem beain”- ki dei ki khubor jong ki placard bala rah da ki samla pule ha ka rally bala pynlong da ka NEHUSU, kaba la khot ruh ia ka jingsangeh leit shong klas ba khlem pud.
Haba kren sha ki samla pule, u General Secretary ka NEHUSU Toniho Kharsati ula ong “Ngim lah ban pdiang ia ka jingkem ia u Sandy Sohtun naba kim shym la iaid kat kum ka lynti kaba dei. Ki Pulit kila wan ban kem ia u Sandy da kaba phong jain iing. Ki khlem lah ban pynithuh ialade kumki Pulit bad ba kila wan ban kem ia u Sandy. Haba kem ia u Sandu, kila kem ruh ia uwei u samla pule hynrei hadien la pyllait noh ia u ha Gate-V halor ka nongrim ba kila kum ithuh bakla ia u (kum uwei pat uba iadonkti lang ha ka jingshoh ia u Nonghikai).”
“Kane ka jingleh jong ki kala pynlong ia ngi ban kylli jingkylli la ki bor Pulit ki dei na ka bynta ban pynneh ia ka shongsuk shongsain haba kila shu wan ban kem ia ki samla pule bad shu bret ia ki ha shiteng lynti” ula bynrap.
Ula ong ba ka NEHUSU ha ryngkat bad ka KSU-NEHU Unit kala pynrem jur ia kane ka jingleh ki Pulit bad bynrap “Ngim long pyrshah ia ka Tnad Pulit naba ki Pulit ki wan hangne ban peit ia ka shongsuk shongsain hynrei ka kam hangne ka long haba ki Pulit kim lah ban wan da ka uniform haba kem briew ka dei kaba la pynmih ia shibun ki jingkylli”.
Haba kdew ia ka mukotduma u DK Basu, u Toniho ula kdew ba ki kyndon kila kren shai ba ki Pulit ki hap ban phong da ki uniform haba kem briew bad ong “Hynrei balei ba kim lah ban bud ia kine ki kyndon (haba wan kem briew hapoh ka phyllaw jong ka skulbah)”.
Ula ther tyngeh ruh ia ka Tnad Pulit da kaba ong “Tang ban iada ia uwei u Nonghikai, phi wanrah iapalat 100 ngut ki Pulit bad CRPF. Kane ka jingjia ka dei tang ka jingkynnoh kat haduh mynta, ki Pulit ki dang tohkit ia kaei kaba jia, kaei kaba donkam ban niew kyrpang ia ka. Nalor kata, ka jingwanrah ia ki bor pulit la leh khlem ka jingbit jong ki bor pyniaid ka University. Kila shu wan bad sdang kem ia ki samla pule bad iaid pahara ha ki hostel”.
Haba pynrem ruh ia ka Sorkar Jylla, u Toniho ula ong “Haba ngi kyntu ia ka Sorkar Jylla ban tuklar ia ki kynrum kynram kiba dang iaid ha NEHU, ka jubab ka long ba ka hap shabar u pud u sam ka Sorkar bad mynta, kumno kala hukum ban wanrah ia ki bor Pulit khlem ka jingbit ki bor khmih ka University. Ngi pynrem jur ia kane ka jingleh namar kam long kaba lah ban pdiang”.
“Ngi long kiba kloi ban iatreilang. Lada phi kwah ban tohkit, ngi long kaba kloi ban ai ka jingiatreilang ba pura hynrei ngim lah ban pdiang ia kane ka jingwan sha ka University jong ngi bad shu kem ia ki samla pule jong ngi. Ngin ieng ialeh pyrshah kum ka NEHUSU. Lada ki Pulit ki dang don hapoh ka University, ngin nym pynsangeh satia ia ka rai ban sangeh shong klas ba khlem pud kum ka dak ban pyrsah ia ka jingwan tuklar ka Tnad Pulit” ula bynrap.
 ha ka sngi Ba-ar kila pynlong ia ka rally bad sdang ruh ia ka signature campaign pyrshah ia ka jingkem ba dang shen ia u President ka NEHUSU Sandy Sohtun bad ka jingwanrah ia ki Pulit ba kiengatiar hapoh ka phyllaw jong ka University.){kind=link}