Shillong, Nohprah 13 : Hapdeng ka jingkynad kaba mih hapdeng ka India bad Bangladesh, da ki spah ngut ki nong Shillong hapoh ka lama All Meghalaya Citizen Conscious Forum (AMCCF) hynne ka sngi Thohdieng, kila pynlong ia ka jingiaid paidbah ha Shillong ban pynrem ia ka jingshah thombor ki paid Hindu ha Bangladesh.
Kane ka jingiaid paidbah kala sdang na lad Mawbah bad pynkut ha Rhino Point.
Ki Nongiashimbynta kila iapyrta slogan ieid ri ba kynthup ia ka “Bharat Mata ki Jai” ban pynpaw ia ka jingiadon ryngkat bad ki ritpaid ha Bangladesh. U Paul ula pynrem jur ia ki kam umsnam pyrshah ia ki paid Hindu bad ban jur ia ka jingdon kam ban leh eiei mardor ban iada ia ka hok bad ka jingshngain jong kine ki rit paid ha Bangladesh.
U Raju Paul, Convenor ka Forum, ula pynbna ba ka Forum kan sa phah ia ka dorkhas sha u Myntri Rangbah Duh ba shipor jong ka Ri Bangladesh lyngba ka Deputy Commissioner ka East Khasi Hills, kaba kdew ia ki jingdawa ban pynkut noh ia ki kam umsnam ha katei ka Ri ba markhap.
“Naduh ba khyllem ka Sorkar kaba jia ha u Nailar ha Bangladesh, ngi la iohi ia ka jingshah pyniap ba shyrkhei jong ki paid Hindu ba kynthup ruh ia ki hynmen ki para kiba dei ki riewlum ba don ha Bangladesh, ki Khristan bad ki Buddhisht. Kila mad ia ka jingshah thombor ba shyrkhei ha ki riewthrang snam” ula ong.
Kane ka jinghuri hura ha Bangladesh kala sdang da ka jingiakhih ki samla pule pyrshah ia ka jingbhah kam, kaba lam sha ka jingpynkhyllem ia ka Sheikh Hasina na ka shuki Myntri Rangbah Duh ka Ri.
Hadien ba ka Hasina kala phet napoh ka Ri, ka jingthombor ia ki rit paid ha kane ka ri kam shym la sangeh satia watla shibun ki jingdawa kila mih na ki kynhun bapher bapher ban pynkut ia ki kam thombor. Namar ka jingiai bteng ki kam umsnam khamtam pyrshah ia ki Hindu, ka jingiadei hapdeng ka India bad ka Bangladesh kala sdang ban mih jingthut.
 hynne ka sngi Thohdieng, kila pynlong ia ka jingiaid paidbah ha Shillong ban pynrem ia ka jingshah thombor ki paid Hindu ha Bangladesh.){kind=link}