Shillong, Kyllalyngkot 30: Ka Hynniewtrep Integrated Territorial Organisation (HITO) hynne ka sngi, kala pynlong iaka Car Rally bad ka jingialang ha Motphran ban pynsngewthuh ia ki paidbah ia ki mat kiba iadei bad ka elekshon khnang ba kan long kaba khuid.
Ia ka jingiaid rally da ki kali bad ki thuk thuk la sdang na Lad Smit bad la iaid lyngba ka Laitkor, Madanriting, St Edmunds, Dhanketi, Civil Point ter ter haduh ban da poi ha Motphran.
Da ki phew tylli ki kali bad ki thuk thuk jong ki nongialam bad ki dkhot jong ka HITO kila iashimbynta ha katei ka rally ha kaba kila rah iaka lama ryngkat bad ka tem ia ki jingrwai jongka seng.
Ia katei ka rally la pynkut ha Motphran bad hadien kane la pynlong ia ka jingialang paidbah ban pynsngewthuh ia ki mat kiba iadei bad ka elekshon ban jied ia ki nongmihkhmat kiba thymmai ha ka 27 tarik u Rymphang 2023.
U President ka HITO u Bah Donbok Dkhar ula ong namar ba ka elekshon kala jan kumta ka long kaba donkam ia ka seng kaba don ia ka jingkitkhlieh ban mih shakhmat ban pynsngewthuh bad ban pynkynmaw ia ki paidbah ia ka jingpulom jong ka sorkar kaba mynta ha ki 5 snem kiba la leit.
U la ong ba ka long kaba kongsan ia ki paidbah ba kin jied ia ki briew kiba don ia ka jingshemphang ha kaban ai ka jingshakri na ka bynta ka bha ka miat jong u paidbah bad ula kyntu ia ki paidbah ba kidei ban jied ia ki nongialam ym da ki nonglilam kiban leit mihkhmat sha ka iing dorbar thawaiñ ka jylla.
“Kum ka seng kaba don iaka jingkitkhlieh, ngim shim la mih ban leh politik ia kano kano ka ishu hynrei ngi mih ban kren bad ban pynshai ia u paidbah ba kim dei ban shah ialam bakla ha kino kino ki kyrtong ne ki seng saiñ pyrthei hynrei kidei ban thep vote da ka jingtipbriew tipblei ban ioh ia ka sorkar kaba khlain hadien ka elekshon” ong u Bah Donbok Dkhar.
U nongialam ka HITO ula ther tyngeh iaka sorkar MDA kaba la ialam da ka seng NPP halor ka jingbym lah ban pynurlong ia ki mat jingdawa jong ki paidbah khamtam ha kaba iadei bad ka ain khalai ne Casino, ka jingbym lah ban pynkohnguh iaka sorkar dpeng ban pyntreikam noh iaka Inner Line Permit (ILP) ha ka jylla ne ban phah pynrung noh ia ka ktien Khasi haka Eight Scheduled jong ka riti synshar ka ri.
“Ngim ialap elekshon ia uno uno u kyrtong ne ia kano kano ka seng saiñ pyrthei hynrei ngi kyntu ia ki paid nongthep vote ba kidei ban pyrkhat bad puson bunsien ha shwa ba kin thep ia ka vote ka jongki ban jied ia ki briew kiban leit mihkhmat shaka iing dorbar namar ngim kwah ban bteng ban mad biang ia ki jingeh sa 5 snem” ong u President ka HITO.
