Shillong, Jymmang 25 : Ka Khasi Hills Autonomous District Council (KHADC), hynne ka sngi Palei, kala iaid khynra Trading Licence jong ki kali kamai ba niah da ki bar Jylla ha kylleng ki jaka ka Nongbah Shillong.
Ia kane ka jingkhynra la pynlong ha ki jaka kaba don ki bar jylla kiba niah ia ki kali kamai, ban pynthikna ba baroh ki nongniah kali kamai bar jylla ki dei kiba bud ia ka ain ka KHADC, ban shim ia ka Trading Licence ba kin ioh niah kali.
Ka jingkhynra kala sdang naduh ka por 11 baje mynstep bad ki jaka bala pynlong ia ka jingkhynra ki kynthup naduh ka Mawprem Taxi Stand, Motphran, MUDA Parking Lot, Luckier Road, Laitumkhrah, Dhankheti, Malki, Barik, Polo, Golflink, Nongmensong, Nongthymmai, Rynjah, Madanrting, Happy Valley, Mawlong Hat, Khlieh Iewduh bad Jhalupara Taxi Stand.
Lah ban kdew ba dang shen, ka synjuk ki Nongniah Taxi ka East Khasi Hills, kala dawa ia ka KHADC ban pynlong ia ka jingkhynra Trading Licence jong ki kali bar Jylla namar ka jingjyllei ki bar jylla ba kamai taxi khlem ki kot ki sla, khlem ka Trading Licence, Professional Tax bad kiwei kiwei, kaba la ktah jur ia ka kamai jakpoh jong ki nongniah taxi trai riewlum ka Jylla.
Kane ka jingdawa kala mih ruh dang shen na ki nongniah taxi ha Khyndai, Police Bazaar, kiba la byrngem ban nym shah kamai ia ki kali bar jylla namar ka jingshah shoh ki nongniah taxi ha ka kynhun ki bar jylla.
Kat haduh ba thoh ia ka khubor, ka jingkhynra kala iaid shaid shaid bad ym pat lah ioh satia ia ki jingtip ba bniah halor ka jingdon ki nongniah taxi kiba pynkhein ia ki kyndon ain ka KHADC.
Ia ka khubor kaba bniah yn sa ioh kham shibit.
