Shillong, Naiwieng 09: Ki Bor pyniaid District ryngkat bad ka Office jongka District Social Welfare Officer, East Khasi Hills District hynne ka sngi Palei, kila pynlong iaka jingpynsngewthuh paidbah halor ka jingktah jong u Drok lyngba ka Nasha Mukt Bharat Abhiyaan na ka bynta ki khynnah bad ki samla pule jong ka Shnong Lyngkhoi.
Ia katei ka jingialang la pynlong ha Raid Lyngkhoi Higher Secondary School kaba don ha Lyngkhoi, ha kaba bun ngut kila wan ban iashimbynta.
Ka District Social Welfare Officer, East Khasi Hills District ka Kong E. Kharchandy, haba ai jingkren kala pynpaw ia ki jingma kiba ap na ka jingdih ia u drok bad ia kiwei pat ki jingdih kiba sniewbad kumno ki jingdih kiba sniew ki pynthud ia ki samla ban pynleit jingmut ha ka pule puthi ka jongki ba kin poi sha ka thong ha ka jingim ka jong ki.
Nalor kane, kala ong ba ka ‘Nasha Mukht Abhiyan’ kadei ka prokram ka ba ialeh ban iakhun pyrshah ia ka jingpyndonkam ia ki jingdih kiba sniew bad ia ka jingkyrni ha ki jingdih kiba sniew da kaba jingiashimbynta shit rhem jong ki khynnah bad ki samla, ki jaka pule bad ki shnong ki thaw.
Kiwei kiwei kiba la ai jingkren ki kynthup ia u Bah M. Marbaniang u Principal jongka Raid Lyngkhoi Higher Secondary School, u Bah S. Lyngdoh u Sordar jongka Raid Lyngkhoi bad ki Counsellor jongka KRIPA Foundation De-Addiction Centre for Children.
