Nongpoh, Naiwieng 09 : Ka Ri-Bhoi Youth Welfare Organisation (RBYWO) hynne ka sngi Palei, kala ujor sha u Deputy Commissioner halor ka jingmih jong ki khyrdop lum khajna be-ain ha ka surok Shillong By-pass.
Ka RBYWO hapoh ka jingialam u General Secretary Bah Kenny Nongrum, kala aiti da ka dorkhas ha u Additional Deputy Commission ka District Raja Brahma, kaba dawa ia ka bor District ban leit tohkit bad khang khyrdep ia kine ki khyrdop.
Haba iakren bad ki nongthoh khubor, u Bah Kenny ula iathuh ba ka Seng kala ioh jingtip la katto katne por ia ka jingdon jong kine ki khyrdop lum khajna beain kiba ju khrong pisa na ki kali kit mar kit mata ha surok Shillong By-Pass.
U ong “Kane ka jingdon ki khyrdop be-ain kala ktah bha ia u paidbah namar ka dei ka daw bah halor ka jingnang kiew ka dor ka mur jong ki mar ki mata khamtam ki marbam mardih”.
Une u Nongialam ka RBYWO ula pyntip ba ka Seng kala dep ban wad jingtip ruh na u CEM ka KHADC Bah Pyniaid Sing Syiem halor kine ki khyrdop khrong khajna, uba la ai jubab ba ki bor ka KHADC kim don jingtip satia shaphang jong ki.
