Pynkut u DyCM ban ialap elekshon ha jaka u CEM ka KHADC
Shillong, Rymphang 19 : U President ka National People’s Party (NPP) Meghalaya bad Symbud Myntri Rangbah Bah Prestone Tynsong, ula kyntu ia ki paid nongthep vote ka Ri-lum Khasi Jaintia ba kin husiar bha ban shaniah ia ki party (VPP) ba kam ieid Jaidbynriew da kaba shu ialam bakla beit ia u paidbah khamtam ki samla.
U Bah Prestone ula buh ia kane ka jingkyntu na ka rynsan ialap elekshon ban pan jingkyrshan ia u Chief Executive Member (CEM) ba mynta ka KHADC Bah Pyniaid Sing Syiem kaba long hynne ka sngi Balang ha Pohkseh, kaba dei ka sngi khatduh ban pynkut ia ka jingialap elekshon.
“Ha ka por ialap elekshon ki mih bun bah ki jingiapyni nia, iapyni jutang na baroh ki seng sain pyrthei, paidbah wat sngew pher….hynrei phi hap husiar namar ki don ki party kiba ialam bakla ia ka pyrkhat pyrdain khamtam ia ki samla” ong u Bah Prestone.
U Symbud Myntri Rangbah ula kynthoh tyngeh “Ka nongrim jong katei ka party ka dei ha ka kyrteng ka Jaidbynriew, leh kat kaba mon. Ki ialap elekshon da ki kyntien ki bym sngew iahar bad ki bym lah ban pdiang. Ki kyntien ba ki pyndonkam ha ki rynsan social media ki long kiba I shyrkhei. Ki sngew bay m don ain, ha ka kyrteng ka Jaidbynrew leh katba mon”.
“Hadien ka elekshon 2023, ka rukom iaid ialap elekshon kane ka party kam dei ban ialap ia ki nongrim ka party hynrei ka don por tang ban bein briew” ula ong haba bynrap “Namar kata, nga kyntu ia ki paidbah ban phikir bad ba kim dei ban shah ialam bakla ha kum katei ka party”.
Haba pan jingkyrshan u paidbah ban pynjop ia u Bah Pyniaid Sing Syiem ha kane ka elekshon, u Bah Prestone ula ong “Lyngba u Bah Pyniaid, ka District Council kala lah ban wanrah shibun ki ain kiba myntoi ban tei ia ka Jaidbynriew”.
Ula ong ba ka Executive Committee ba ialam da u Bah Pyniaid kum u CEM, kala wanrah ia ki ain ban ai jingithuh ia ki Kur, ki Dorbar Shnong, ki Seng Samla bad ki Seng Longkmie. “Ka Nongthymmai kam dei ban pynleh nohei ia une u maw”ynnai” ula ong.
U Bah Prestone ula pynpaw ia ka jingsngewskhem ba ka NPP kan thaw biang ia ka Executive Committee ha KHADC bad kan dei kaba ialam da u Bah Pyniaid Sing Syiem.
“Iai bteng ban kyrshan ia u Bah Pyniaid khnang ba un nang lah ban wanrah ia ki ain ban pynkhlain shuh shuh ia ka KHADC “ ula ong haba bynrap “Namar kata, Nga kyrpad rit iaphi, sngewbha ai ka jingkyrshan ia u Bah Pyniaid na Nongthymmai constituency namar udei u briew uba la biang tam bad udei uba trei shibun ki kam”.
Une u Nongialam ka NPP ula ong ba ka NPP kala kut jingmut shisha ban trei na ka bynta ka bha ka miat u paidbah bad ban kyntiew ia ka Jylla ha ka roi ka par ha baroh ki liang. Ula ong “Ka Sorkar ba ialam da ka NPP ka dei ka Sorkar kaba treikam bad dei namar kata ba ka shah kynthoh laiphew jait ha ki Liang Pyrshah”.
“Wat hapeng ka jingshah kren bein, shah lynthem maw, nga iohi ba ki paidbah ka Jylla ki dang kyrshan bad shaniah hi iaka NPP namar ka dei ka Party kaba trei iala ka kam naka bynta ka bha ka miat ki paidbah bad ka Jylla baroh kawei” ula bynrap.
Ula pyntip ba ha ka jingsynshar ka NPP, ka Sorkar dang shen kala buh ia u maw nongrim ban tei ia ka Secretariat ba thymmai ha New Shillong ha ka jinglut ba ym duna ia ka T.1200 klur nalor ka jingpynurlong ban wanrah ia ki 5 star hotel-kaVivanta Taj bad ka Marriott ha Khyndai Lad.
 Meghalaya bad Symbud Myntri Rangbah Bah Prestone Tynsong, ula kyntu ia ki paid nongthep vote ka Ri-lum Khasi Jaintia ba kin husiar bha ban shaniah ia ki party (VPP) ba kam ieid Jaidbynriew da kaba shu ialam bakla beit ia u paidbah khamtam ki samla.){kind=link}