Nongpoh, Nailur 30: U Syiem ka Raid Marwet Arun Ken Syiem, ula hukum ia baroh ki dukan jong ki bar Jylla kiba don hapoh ka Raid, ba ki dei ban don ia ka Trading Licence na ka Khasi Hills Autonomous District Counci (KHADC) lem kumta kin hap khang shuwa ia ki dukan.
U Syiem ula pynmih ia kane ka hukum ha ka jingialang bad ki traijong ki dukan bar Jylla, kaba la pynlong hynnin ka sngi Thohdieng hapoh ka Ophis treikam ka Raid kaba don ha 9 Mile Baridua.
Kane ka jingbthah u Syiem kala mih ruh hadien katto katne sngi ba ka KHADC hapoh ka jingialam u CEM, kala shem ia ka jingdon bun ki dukan jong kibar jylla kiba la plie be-ain hapoh ka thain.
U Syiem ula khot ia baroh ki trai jong ki dukan bar jylla hapoh ka Ophis bad bthah ia ia kito ki bym pat don ia ka Trading Licence ba ki dei ban aplai noh lem kumta kin hap khang shuwa ia ki dukan tad haduh da ioh ia ka Licence.
Ha kane ka jingialang, la iadonlang ruh u Executive Member I/c ka Trade Bah Gigur Myrthong lem bad u MLA/MDC ka Nongstoin Bah Gabriel Wahlang.
Ki bar jylla kiba wan iashimbynta ha ka jingialang kila kohnguh bad pynpaw ia ka jingkloi ban bud ia ka hukum bala pynmih da u Syiem. Don ruh ki bar jylla kiba la pynpaw ba kila dep ban aplai ia ka licence hynrei ka KHADC kala pynslem palat ban ai. Ki don ruh kiba kynnoh ba ki briew jong ka Council kila buh ia ka dor kaba heh ban leh ia ka licence.
Halor kane, u EM ula pynshai ba ka jingslem lehse ka dei namar ka jingbym lah pynbiang lut ia ki kot ki sla kiba donkam hynrei halor ka jingsiew, ula pynpaw ba un hap ban wad bniah la ka dei ne kaba lait kane ka jingkynnoh.
 lem kumta kin hap khang shuwa ia ki dukan.){kind=link}