Shillong, Naiwieng 18 : U Myntri ka Koit ka Khiah Bah Wailadmiki Shylla, ula bthah ia ki Ophisar ba kin siew noh ia ka baiwai iing jong ka Nehru Memorial State Dispensary ha Mawlai Nonglum, kaba la pynsahteng mynta la jan san snem.
“Nga kyndit ban tip ba ka Tnad ka khlem pat siew ia ka bai wai iing la jan san snem” ong u Myntri uba la ioh jingtip shaphang kane ka jingbym pat siew bai wai ka Dispensary.
Ula ong “Nga la kren ia ki Ophisar bad ki nongpyniaid jong ka Dispensary bad bthah ia ki ba kin leh noh mardor ia kaba donkam”.
U Myntri ula khein antad ba ka bai wai ba pynsahteng ka lah ban poi hapdeng T.8-10 lak. “Nga la kylli balei ba ki khlem siew ia ka bai wai la bun tylli ki snem bad bthah ia ki Ophis ba kin leh noh mardor ia kaba donkam” ula bynrap.
U Bah Shylla ula pynpaw ruh ia ka jingeh bala mad da ka Sorkar Jylla ban thied jaka ha Mawlai na ka bynta ban ioh shna ia ka building ba shirta jong ka Dispensary.
“Ka Sorkar kala pyrshang kat kaba lah ban ioh iala ka jong ka jaka, hynrei ngi la iakynduh jingeh namar ka jingduna kiba tyrwa jaka” ula ong haba pynpaw ia ka jingkyrmen ba shen yn sa lah ban pynbeit noh ia kane ka kam.
