Shillong, Rymphang 04 : Ka Justice BP Katakey Committee kala hukum ban pyndep noh ia ka kam ban leit lum ia ka pisa ba T.530.59 lak na ki 15 tylli ki karkhana coke bad T.1,31,37,800 na ka M/s Shree Sakambari Ferro Alloy Pvt Ltd.
Ha ka 34th interim report bala aiti sha ka Iingkashari Meghalaya High Court, ka Committee kala bthah ba dei ban aiti ia ka kaiphod kaba long ba man mynta hapoh ka 3 taiew”.
Ka Committee kala ong ruh ba dei ban pyndep noh kyrkieh ia ka jinglum ia ka pisa kaba dei ban ioh na kine ki karkhana.
La pyntip ia ka Committee ba 20 tylli ki show cause notice lah dei ban ai sha ki karkhana coke ha kylleng ka Jylla, hynrei ym pat shym la ioh satia ia ka pisa haduh mynta.
“Ka pisa ba dei ban siew da ka M/S Shree Sakambari Ferri Alloy Plant Pvt Ltd, lah pynthymmai sha ka T.1,31,37,800 bad la shim ia ka sienjam ban lum noh ia kane ka pisa” ong ka Committee.
Ka Committee kala ai jingmut ban pyndep noh ia ki kam ban lum ia ki pisa ba dei ban ioh hapoh ka por kaba shonghok, haba pynthikna ba ka Jylla ka ioh lut ia ka pisa ba ka dei ban ioh.
