Nongpoh, Nailar 28 : Ka Iingkashari Special Judge (POCSO) ka Ri-Bhoi District, kala hukum ban set phatok haduh 10 snem ia ki lai ngut ki runar kiba thmu ban iabat bor jubor ia lai ngut ki khynnah ha ka thain Nongpoh.
Kine ki laingut ki kyrteng u Mawri Ksing, Sbishon Songthiang bad u Bron Prang, kiba la shah pynngat kam bymman hapoh ka kyndon 448/376D/511/354A IPC pule lang bad ka kyndon 9(g)/10 POCSO Act.
Kat kum ka jingpyntip u Superintendent of Police ka Ri-Bhoi, VS Rathore, kane ka case ka dei kaba la register ha Nongpoh Police Station kat kum ka Case No 147(06)2017 u/s 448/376D/511/354A IPC pule lang bad ka kyndon 9(g)/10 POCSO Act bad ia ka jingtohkit la pynkhamti ha ka WP/UBSI E. Khardewsaw.
La iathuh ba dei ha ka 29 tarik Jylliew 2017, ki Pulit ka Nongpoh PS kila ioh jingtip ba ha ka 28 tarik Jylliew, kine ki laingut ki runar hadien ba kila iadih kyaid bad buaid, kila leit ryng ha kawei ka iing bad kila jrong kti khlem akor ia ki laingut ki khynnah da ka jingthmu ban iabatbor ia ki.
Hadien ka jingbishar kaba bniah kat kum ka chargesheet bala aiti ha ka 23 tarik Risaw, 2017, ka Iingkashari kala ai ia ka hukum ban set phatok ia kine ki runar haduh 10 snem lem bad ka kuna ba T.20,000 namar ka jingpyrshang ban iabat bor jubor ia kine ki khynnah, kaba hap hapoh ka kyndon 376D/511 IPC.
Ka Iingkashari kala hukum ruh ban set phatok ba 6 bnai namar ka jingleit rung jubor ha ka Iing kaba iaid kat kum ka kyndon 448 IPC bad ka hukum ban set phatok 2 snem bad ka kuna ba T.1000 namar ka jingjrong kti khlem akor kat kum ka kyndon 354 A IPC.
Nalor kine, ka Iingkashari kala hukum ruh ban set phatok 6 snem bad ka kuna ba T. 10,000 ia kine ki lain gut namar ka jingleh khlem akor ba palat pud.
 ka Ri-Bhoi District, kala hukum ban set phatok haduh 10 snem ia ki lai ngut ki runar kiba thmu ban iabat bor jubor ia lai ngut ki khynnah ha ka thain Nongpoh.){kind=link}