Tura, Naitung 01: Ka Iingkashari District Judge kala hukum ban set along bun bun snem bad ka kuna ia ki arngut ki runar kiba leh beijot ia ki Khynnah rit ha ki artylli ki jingjia ba jia ha Ri-lum Garo.
Uwei na kine ki runar, u Rasthy A Sangma ula shah rai set phatok haduh 20 snem bad ka kunba T 25000 da ka Iingkashari POCSO halor ka jngleh beijot ia kawei ka khynnah hala ka jong ka iingsah kaba jia ha u snem 2020. Une u briew un ngat shong along sa 6 bnai lada um lah ban siew ia ka kuna bala buh da ka Iingkashari.
Uwei pat u runar u Beatbeat Ch Marak uba leh beijot ia kawei ka kynthei ha lyngkha, ula ngat shong phatok haduh 7 snem lem bad ka kuna ba T. 7000 halor kane ka kam bymman bad sa 3 snem ha ki artylli kiwei pat ki kam bymman.
Ha ka 14 tarik Lber 2020, ki Pulit ka Tura Women Police Station kila ioh jingtip ba u Rasthy A Sangma ula leh beijot ia kawei ka Khynnah hala ka jong ka iing la jan shisnem eiei. Halor kane ka jingjia, ki Pulit kila register case hapoh ka Tura Women PS Case No. 16(03)2020 u/s 5(n)/6 POCSO Act, 2012 bad ia ka jingtohkit la pynkhamti ha ka WPSI Salmay R Marak.
Ka Jingtohkit kala sted bha bad la lah ban aiti ia ka chargesheet ha ka 12 tarik Jymmang 2020, kaba long hapoh ka 60 sngi kat kum ka por bala buh da ka ain.
Hadien ka jingshong bishar, ka Iingkashari Special Judge (POCSO) West Garo Hills, Tura, kala lap ia une u briew u Rasthy A Sangma ba u leh ia kane ka kam bad la pynngat ia u hapoh ka kyndon 5(l)/(n)/6 of POCSO Act, 2012.
Ka Iingkashari kala hukum ban set along ia u haduh 20 snem lem bad ka kuna ba T. 25000 haba buh kyndon ruh ba lada um siew ia kane ka pisa, un hap ban shongalong tam sa 6 bnai.
La pyntip ruh ba une u juh u briew u dei ruh uba donkti ha kawei pat ka kam bymman ba kum kane ia kaba la register case hapoh ka Tura Women Police Station ha u snem 2016 kat kum ka kyndon 376 IPC r/w 6/10 POCSO Act, 2012 bad ia kane ka kam la dep ban chargesheet ha ka 21 tarik Naiwieng 2021 bad ka dang don mynta hapoh ka jingbishar.
Ha kawei pat ka jingjia, ha ka 4 tarik Risaw 2016, ki Pulit ka Tura Women Police Station kila ioh jingtip ba uwei u briew ba kyrteng u Beatbeat Ch Marak ula leh beijot ia kawei ka kynthei katba ka dang leit kheit jhur. Une u briew ula byrngem byrsit ia kane ka kynthei lada ka pyntip briew ia kane ka jingjia.
Hadien ka jingiohpdiang ia ka jingujor, ki Pulit kila register case ia kane ka jingjia hapoh Tura Women Police Station kat kum ka kyndon 323/376/506 IPC bad ia ka jingtohkit la aiti ban khlieh da ka WPSI WPSI Renu D. Momin. Kane ka heh Pulit kala pynsted bha ia ka jingtohkit bad kala lap ban aiti ia ka chargesheet ha ka 31 tarik Naitung 2017.
Ka Iingkashari District& Session Judge, West Garo Hills, Tura, kala shem ba u Beatbeat u leh ia kane ka kam bad kala pynngat ia u ha ka jingpynsajia kat kum ka kyndon 323/376(1)/506 Part II IPC. Ka Iingkashari ha ka 31 tarik Jymmang 2022, kala hukum ban set phatok ia une u briew haduh 7 snem bad ka kuna ba T.10000 halor ka kam bymman ba u la leh kaba hap hapoh ka kyndon 376(1) IPC.
Halor ka kyndon 506 Part II IPC bad 323 IPC, ka Iingkashari kala hukum ban set phatok ia u sa 2 snem bad 1 snem.
