Mih ki jingkynnoh ba dei ka jingpynhiar kput u Myntri Rangbah ka Assam
Shillong, Rymphang 23 : Ka Iingkashari District Court, Sribhumi, kala phah set ia u Chancellor ka University of Science & Technology Meghalaya (USTM) Mahbubul Hoque sha ka judicial custody ba khatsaw sngi.
Ia u Mahbubul la ialam tian bishar hynnin ka sngi saitjain haph ka Iingkashari hadien ba kem halor ka jingkynnoh ba u donkti haki kam lehthok jong ka eksam Central Board of School Education (CBSE).
Ka Iingkashari kala kyntait ban ai bah jamin ia u Mahbubul bad kala phah set ia u hapoh ka judicial custody.
Ha kajuh ka por, kane ka jingshah kem u Chancellor ka USTM kala pynlong ia kiba bun ban peitkhmat kum ka kam leh kput ha ka kam sain pyrthei. Ka jingshah kem kala mih tang hadien katto katne sngi ba ma u (Mahbubul) bad ka USTM kala shah kynnoh laiphew jait ha u Myntri Rangbah ka Assam Himanta Biswa Sarma.

U samla pule barim ka Aligarh Muslim University, Dr Maskoor Usmani ula niew ia kane ka jingshah kem kum ka jingsuh buit ba da ki bnai ban thombor ia u Mahbubul.
Haba kynthoh hapoh ka X, ula ong “Ka jingkem ka dei ka jingsuhbuit ba bala bun bnai ban thombor da u Myntri Rangbah ka Assam, tang ban myntoi shimet. Balei ba u Myntri Rangbah ka Jylla ula pynlong ia kane ka kam kum ka jinghiar kput sain pyrthei bad shimet?. Balei ba u pyrshang ban khein troin bad pynduh ia ka skulbah kum ka USTM kabala ioh jingithuh kum ka NAAC-A Grade, kaba treikam hapoh u pud u sam ka Jylla Meghalaya bad kaba shah pyniaid ha ki kyndon jong ka UGC”.
U MP barim ka Lok Sabha na Assam Abdul Khaleque haba pynrem jur ia ka Sorkar bad ka jingkem, ula ong “U Myntri Rangbah ka Assam Himanta Biswa Sarma ula kynthoh khlem pep ia u Mahbubul hakhmat u paidbah ha kine ki khyndiat bnai bala leit”.
Ki Pulit ki ong ba ka jingkem ka dei kaba don jingiadei bad ka jingmih ka jingkulmar ha ka eksam Physic ki klas XII ha kawei ka Central Public School ha ka thain Patharkandi kaba hap hapoh ka Sribhumi District. Ia kane ka skul la pyniaid da ka Education and Research Development (ERD) Foundation ba bei tyngka da u Hoque.
U Himanta Biswa ula kynnoh ba katto katne ki samla pule kila shah kular ban ioh bun marks ha ka eksam CBSE ha u Mahbubul. “Ki Pulit ka Assam ki dang tohkit ia kane ka kam bad kile dep ruh ban register ia ka case. Kane ka dei ka kam kaba khia bha bad ngi pan ia ka jingkyrshan na baroh” ula ong.
Haba ialam sha Iingkashari, u Mahbubul ula iathuh ha ki lad pathai khubor, ba ki bor pyniaid skul kila pyrrkhing bha ia ki kam leh thok bad ki samla pule ruh kila kubur ba ym shym la shah ia ki ba kin leh thok.
Kaba phylla, ka kynhun ki samla pule bala kynnoh ba ka Vision 50 Academy, kaba pyniaid da ka ERDF, kala kular ia ki ban ailad leh thok haba thok ia ka MCQ section ba 30 mark. Hynrei, ia kane ka jingailad ym shym la pynurlong satia hapoh ka centre thoh eksam.