Shillong, Iaiong 11 : Ka Iingkashari u Special Judge (POCSO) ka East Khasi Hills, kala hukum ban set along haduh 25 snem ia uwei u briew uba donkti ban leh beijot ia I khynnah hapoh ka kyndon POCSO Act.
Une u briew u kyrteng u Androsing Mawthoh bad ka Iingkashari Speical Judge (POCSO) MK Lyngdoh, kala pynmih ia kane ka hukum ha ka 3 tarik Iaiong.
Haba pyntip ia kane, u Superintendent of Police (SP) ka East Khasi Hills, ula pyntip ba ka Iingkashari kala pynngat pynsajia ia une u runar hapoh ki 4 tylli ki kyndon ain.
U iathuh ba ha ka kyndon 4 jong ka POCSO Act, ka Iingkashari kala hukum ban set along ia u haduh 20 snem ryngkat ka kun aba T.30,000 bad lada ym lah ban siew ia ka kuna, un hap ban shong along sa 4 bnai.
Hapoh ka kyndon 6 jong ka POCSO Act, ka Iingkashari kala hukum ban set along bun eh kaba long haduh 25 snem lem bad ka kun aba T.50,000 bad lada ym lah siew ia ka kunsa, yn hap ban shong along sa 6 bnai.
U Bah Vivek u iathuh ba une u runar ula shah pynngat ruh ha ka kyndon 8 jong ka POCSO Act ha kaba ka Iingkashari kala hukum ban set along 3 snem lem bad ka kun aba T.10,000 . Lada um lah siew un hap shong along sa 2 bnai.
Nalor kine ki kyndon, ula shah pynngat ruh ha ka kyndon 10 jong ka POCSO Act ia kaba ka Iingkashari kala hukum ban set long 7 snem lem bad ka kun aba T.20,000 bad lada um lah ban siew, un hap ban shong along sa 3 bnai.
Ia kane ka case la register hapoh ka Madanrting Police Station bad la tohkit ia ka da ka WPSI K Kumari kaba don mynta hapoh ka tnad CID, Meghalaya, Shillong.
