Shillong, Nailar 16: Ka Meghalaya High Court ka la bthah ia ka sorkar jylla ba kan pynlong ia ka jingkhynra man ka por ha baroh ki dukan bad ban dain kuna kaba heh bha ia kito kiba pyndonkam ia ki plastik hapoh ka jylla Meghalaya.
Ka la bthah ruh ïa ki bor pynïaid jong ka temple ban pynthikna ba kan ym don kano kano ka jingpyndonkam ïa ki pla plastik hapoh bad sawdong jong ki jaka mane blei.
Haba bishar ia ka PIL kaba dawa ban khang ia ka jingpynmih, jingbuh, jingpyniaid bad jingpyndonkam ia ki pla single use plastic (SUP), ha ka sngi Thohdieng, ka Kashari ha ka hukum jongka ka la ong, “Ka Sorkar Meghalaya ka dei ban peitngor bha ba ka ki mar plastik ki dei ban shah bat naduh ka khyrdop ba rung”.
“Markhap ka High Court, ngi lah ban sakhi ba ki don ki jinglum plastik ha ki dukan. Dei ban pynlong ia ka jingkhynra man ka por ha baroh ki dukan bad ka sorkar Meghalaya ka dei ban pyrkhat ha kaban dain da ka kuna kaba heh pyrshah ia kito kiba pyndonkam ia ki plastic hapoh ka Jylla. Ka jingpyntreikam kaba pyrrkhing ia ka ain hi ka dei ka lynti ka ban iarap ban pynduh jait ia ki plastic na ka imlang sahlang” kala ong.
Ka Iingkashari kala ong “Kum ka jingsdang, ia kum kane ka kam (khynra) lah ban sdang shuwa na ki Temple. Ki bor pyniaid jong ka Temple ki dei ban pynthikna ba ym dei ban don kano kano ka jingpyndonkam ia ki pla plastic hapoh bad sawdong jong ki jaka mane. Dei ban leit jurip man ka por ia ki dukan bad lada shem ia kino kino ki dukan kiba buh ia ki plastic, dei ban dain kuna kaba heh bha bad lada ki dang iai bteng, ia kine ki dukan dei ban khang tala bad shon muhor”.
Kala ong ruh “ Dei ban pyndait ia ki kor CCTC ha baroh ki Temple khang ba ynlah ban tehlakam lada don kiba rah ia ki plastic shapoh jong ka Temple”.
Ka Ïingbishar ka la bthah ruh ba ka Sorkar ka dei ban file ïa ka affidavit ba pyrshah / jubab halor ki sienjam ba ka la shim ban tehlakam ïa ka jingpyndonkam ïa ki plastik hapoh ka jylla Meghalaya.
Ka hukum ka la ong ba kat kum ki jingioh jingtip, man la u snem ki plastic ki pyniap ia 1 million tylli ki sim duriaw bad 100,000 tylli ki mrad duriaw, ki dakar bad ki dohkha bad namar ka jingpynjaboh jong ka plastic , ki mrad kila shu jah noh namar ha ka jingioh nguid bakla, jingiap op bad jingshah kyllain ne shah khum.
Ki mrad khlaw kum ki sim, ki whale, ki dakar bad ki dohkha ki lah ban bam iaki jakhlia plastik da ka jingmut ba dei ka bam bad iap pat na ka jingbym tylliat ka kpoh namar ka jingsahkut jong ki plastic shapoh kpoh.
