Shillong, Nailar 23: Ka Deputy Commissioner ka East Khasi Hills Kong Isawanda Laloo, hynne ka sngi ba-ar, kala pynmih ia ka hukum ban phah kyndang noh ia baroh ki dukan madan kiba pynlong jaka iadie iathied ha ki rud surok bad ki lynti iaid kjat (footpath) jong ka Nongbah Shillong.
Kane ka hukum kala mih halor ka hukum jong ka Iingkashari Meghalaya High Court ba 16 tarik Nailar, kaba la pynpaw ia ka jingbym sngew iahap ba ki nongshongdukan madan kin pynlong dukan ha ki lynti iaid kjat bad ki rud surok jong ka sor Shillong bad Tura lem bad ha kiwei kiwei ki jaka.
Ka Iingkashari haba shong bishar ia ka mukotduma kala pynpaw ruh ba “kan ym don satia kano kano ka lad ban pyllait ia ka jingdheng kali lada ym lah ban tehkyndon ia ki nongshongmadan bad weng noh ia ki dukan na ki lynti iaid”.
Ka Deputy Commissioner ka pyntip ba u Chief Secretary ka Jylla ula lum ia ka jingialang hynnin ka 22 tarik Nailar ban peit ia ka jingpyntreikam ia ka hukum ka Iingkashari bad ula bthah ia ki Deputy Commissioner ban leh eiei noh mardor halor kane ka kam.
Kane ka khliehduh ka District ka pyntip ruh ba kila don ki jingujor na ki bor Shnong bad ki Nongshongshnong halor ka jingnang kha ki dukan madan ha kylleng ki jaka jong ka Nongbah bad kane ka jingiadie iathied kala ktah ia ka iaid ka ieng ba kylluid jong ki paidbah kat kum ka Article 19 (1) (d) bad kumjuh jong ki kali kat kum ka Meghalaya Police Act and Control of National Highway (Land and Traffic) Act, 2002 .
“Kane ka jingpynthut jong ki dukan madan ia ka iaid ka ieng kala ktah ruh ia baroh kynthup naduh ki tynmen ki kro bad ki Khynnah skul. Ngi la ioh khubor ruh ba iwei I Nongshongshnong ila mynsaw na ka jingshah rat ha ka bos namar ka jinghap ban iaid na surok naba ka lynti iaid kala dap da ki nongshongdukan madan, kaba pynpaw ba ka don ka jingma kaba khraw ia ki paidbah” kala ong.
“Kala don ruh ka jingujor na ka Seng jong ki briew ba don jingduna ha ki Dkhot met ba ong ba ki ruh ki dei ban ioh ia kajuh ka hok ban iaid kylluid ha ki lynti iaid paidbah hapoh ka Nongbah” kala bynrap.
Ka Deputy Commissioner ka ong ruh ba don ruh ka jingsngew ba ka rukom shong dukan madan ha kiba bun ki jaka ha Nongbah Shillong ki dei ki bym shngain bad bym ikoit ikhiah. “Ym tang ka jingdie ia ki jingbam khlem da bud ia ki kyndon jingshngai (food safety) hynrei ka jingpyndonkam ia ki shula, ki karai, ka ding harud surok bad ka rukom shong jong ki nongdie dukan ba phai lynti ia ka lynti iaid kali, ka buh ha ka jingma kaba khraw ia ki nongshong dukan madan bad ruh ia ki paidbah” kala ong.
Ka Deputy Commissioner kala kren ruh halor ka kyndon jong ka Motor vehicle Act 1988 kaba kdew ia ka hok ban iaid kylluid jong ki kali bad ruh ia ka kyndon 179 ba pynngat kuna iakino kino kiba pynthut ia ka jingiaid ki kali ha ki surok paidbah. Ka ong ba ka jingkyntur sha ki surok paidbah ba pynthut ia ka jingiaid ki kali ka long ruh pyrshah ia ka Meghalaya Police Act and Control of National Highway (Land and Traffic) Act, 2002.
“Namar kata, na ka bynta ka bha ka miat uba bun balang, la hukum ia baroh ki nongshongdukan madan kiba shong dukan ha kylleng ki jaka ba pynthut ia ka jingiaid ki paidbah bad ki kali, ba ki dei ban kynriah noh shisyndon na kine ki jaka” kala ong.
Ka Deputy Commissioner kala pyntip ruh ba ki jaka ki bym shah shuh ban shong dukan madan hangne ha Nongbah Shillong ki kynthup ia ka thain Motphran, GS Road sha District Council, Umsohsun sha Motphran, Motphran sha Mawlonghat (Anjalee), Motphran point, Motphran sha Mission Compound, YMCA sha Motphran point.
Kiwei pat ki dei Police Bazaar Area, Thana road, Jail road, Police Bazaar Main Road (Kyndailad sha Dreamland), Kyndailad Point, Polo Area, jingkieng Polo sha jingkieng Lawmali, Civil Hospital Area, NH 44, IGP Point Area, Barik Point Area, Laitumkhrah Area, Laitumkhrah Main Road (Fire Brigade sha Beat House), Laitumkhrah Main Road (Beat House sha Police Point), Laban Last Stop area, Rynjah area, Nongmensong point sha Wahkdait bad ka Madanrting Taxi Stand.
Ka Deputy Commissioner ka pyntip ruh bala thaw mynta ia ki Committee bala khlieh da ki Magistrate ba kynthup ia ki Pulit bad ki Ophisar ka Shillong Municipal Board (SMB), PWD (Roads) bad kiwei kiwei nalor ban pyniadon bynta lang ia kiwei ki kynhun kat kaba ibit, ki ban sa leit jurip ha kylleng ki jaka ban pyntreikam ia ka hukum.
“Ki Committee kin leh da kaba tyngeh bad pynthikna haba burom ia ka hok ban kamai jakpoh, ba ki dukan madan kim dei pat ban knieh noh ia ka hok jong kiwei pat ki Nongshongshnong” kala ong haba pyntip ba ia kane ka hukum la pynmih namar ka jingdonkam kyrkieh ban tuklar ha kaban pynthikna ia ka jingshngain jong ki paidbah.
“Kane ka hukum kan ym ktah la kumno kumno ruh ia ka sienjam ba dei ban shim hadien ka jingpyntreikam ia ka Central Act jong ki nongshongdukan madan bad ka jingthaw ia ka Rules” kala bynrap.
Ka Deputy Commissioner kala pyntip ba kine ki Committee ki dei ban pyndep ia ka jingleit jurip bad pyntreikam ia ka hukum hapoh ka 10 sngi.
