Shillong, Naitung 27: Ka Hynniewtrep National Youth Front (HNYF) East Khasi Hills kala pyntip ba ka Meghalaya Urban Development Authority (MUDA) hynne ka sngi Palei, ka la pynmih iaka jingpyntip (Notification) bala pynsangeh ia baroh ki jingtei ba thymmai ha Them Iew Mawlong.
Haba kren sha ki lad pathai khubor u President ka HNYF East Khasi Hills bah Bless Dkhar ula iathuh ba ia kane ka jingtei (Building) thymmai la tei hadien ka Thangkhiew Petrol Pump bad kane ka Building kadei jong ka kong Phibora Marwein.
U bah Bless ula ong baka jingpyrshah jong ka seng ban tei iaki jingtei thymmai ha Them Iew Mawlong kadei namar baka jaka ka dang don hapdeng ka jingbishar ha Meghalaya High Court namar ka sorkar jylla ka dang ialeh ban pynkynriah iaki briew ba sah ha kane ka jaka sha kawei pat ka jaka.
U bah Bless ula iathuh ba naduh bala paw bala don kiba la sdang ban tei jingtei (Building) thymmai, ka seng kala leit ban kynduh iaka Shillong Municipal Board (SMB) bad iaka MUDA ban lap iaka jingshisha.
Haba kylli mano ba ai jingbit ban tei jingtei (Building) thymmai ha Them Iew Mawlong u bah Bless ula ong “Kumba paw naka jingpyntip (Notification) bala pynsangeh iaka jingtei thymmai kadei hi ka MUDA ba ai jingbit namar lada kam ai jingbit, kam don bor ban pynsangeh iaka jingtei thymmai”.
“Lah ban ong ba kane ka jingshim khia jong ka seng kala pynlong iaka MUDA ban pynsangeh iaka jingtei (Building) thymmai ha Them Iew Mawlong” la ong u bah Bless.
