Guwahati, Jymmang 11: U Myntri Rangbah ka Assam Himanta Biswa Sarma hynne ka sngi Palei, ula ong ba ka jingtyrwa ban khang noh ia ka jingshong kurim bun lok ha Assam kam dei satia kaba thew sha kano kano ka Jaidbynriew.
U Himanta ula kren ia kane haba jubab ia ka jingkynthoh jong u President ka AIUDF u Badruddin Ajmal.
U Himanta ula ong ba ka jingkhang ban shongkurim bun lok ha Assam kan treikam naduh u snem 2024. “Ka Sorkar jong ngi ka kwah ban pynkut noh ia ka jingshong kurim bun lok ha Jylla” ong u Himanta.
Une u Myntri Rangbah ula ong “Kamp her, la u briew u dei u Hindu ne Muslim, ym don ba lah ban don bun lok”.
“Ka Sorkar Assam kala rai ban thaw ia ka Committee ka ban shong bishar ia ki kyndon jong ka Muslim Personal Law (Shariat) Application Act, 1937 ha ryngkat bad ka Article 25 jong ka Riti Synshar ka Ri India” ong u Himanta.
Ula ong ruh ba ka Sorkar Assam ka thmu ban pynbna ia ka jingshong kurim bun lok kum kaba bei riti bad ba long beain.
U President ka AIUDF Badruddin Ajmal ula kynnoh ba u Himanta Biswa Sarma ula shu jied ban pynlong sohpdung ia ki Muslim bad mushlia ia ki dustur jong ka niam.
