Shillong, Jymmang 28: U Myntri Sorkar Bah Alexander Laloo Hek, ha ka sngi Balang u la leit sha Sohra ban bishar ia ki kam ba iadei bad ka jingiawad ia ki shikurim ba na Indore, Madhya Pradesh- ka Sonam bad u Raja Raghuvanshi, kiba la jah rngai myn shem taiew ha ka thain Sohra.
Kine ki shi lok kila wan poi ha ka shnong Mawlakhiat (Elaka Mynteng) ha ka 22 tarik mynta u bnai Jymmang ban leit jngoh ia ka jingkieng diengjri ia kaba la tip kum ka Double Decker Root Bridge kaba don ha Nongriat ha ryngkat u nongialam lynti u Bha Wansai.
Kine kila sah miet ha Shipara Homestay bad dang step kila mih noh ha ka 23 tarik u jymmang da ka jingthmu ban leit phai biang sha Mawlakhiat. Hynrei ym shym la iohi shuh ia ki naduh kata ka por.
Ha ka 24 tarik la lap ia ka scooty ba ki shimwai na Sohra Rim, kaba la don lang bad u shabi. Ki Pulit kila ioh pdiang ia ka jingujor na ki bahaiing jong kine ki shikurim kiba la pyntip ba ka phone jong kine ki shijur kala lip naduh ka miet sngi U Blei.
Ha ka jingtohkit, ki Pulit kila lap ba kitei ki shijur kila ieh ia ki tiar bad ki pla jong ki ha Manha Homestay kaba don ha Saitsohpen, Sohra, bad hadien la plied noh ia kine ki pla ha khmat kiba ha iing hynrei ym shym la lap ksai satia shano ba ki don.
Kila don lai tylli ki kynhun ba iawad (search and rescue teams) ia kine ki shijur da ka jingiarap lang ki K9 units, ki drone na ka North Eastern Space Applications Centre (NESAC), bad ruh ki pulit Special Operations Team (SOT), kiba la leit ban wad ha kylleng ki jaka.
Kine ki jaka ki kynthup ia ka Nongriat, Pyndemdkhar, Mawlakhiat, Mawsahew, Wahkaliar bad ha Weisawdong. Ka jingwad ka iai bteng wat shaduh ki riar ba jylliew jong ka Mawkdok, Umdiengpoh bad Sohra Rim bad ha ryngkat ka shilynter jong ka surok na Shillong sha Sohra.
U Bah Hek u la ioh ruh ban peit bniah ia ka jingtrei kam jong ki tnad bapher bapher bad u la pynpaw ruh ba donkam ban pynsted iaka jingiatrei lang bad pynlong ia ka jingiawad bad u la kular ruh ba ka sorkar kan kyrshan pura bad kyntu ia baroh ban ia snohkti ban dang pynjur shuh shuh ia ka jingwad ban lap ia kine ki shijur kiba la jah noh.
