Nongstoiñ, Ïaïong 12: U Majistor ka West Khasi Hills bah D Marwein, hynne ka sngi Balang, ula leit ban tohkit ia ka jingdon jong ka kompani ba ksam marpoh khyndew ha Mawlangria, kaba jngai katto katne kilometre na surok Rambrai-Mawdoh.
Kane ka jingleit tohkit kala mih hadien ba ka FKJGP-Rambrai Circle kala leit ban pan jingpynshai na u Deputy Commissioner ka District hynnin ka sngi Ba-ar halor ka jingtreikam jong katei ka kompani ka ba ym don ba bna mano mano ruh.
Ia une u Majistor la synran da ki Nongialam ka FKJGP-Rambrai Circle, kiba la leit ban jngoh dalade ia ki mashin bala pyndonkam ban ksam shapoh mei ramew bad ruh ki tiar ki tar ba kynthup ia ki puh shilum, ki pipe bad kiwei kiwei.
Ha ka jingtohkit ia uwei u Nongniah jong ka kali puh shilum, la shem ba une u briew um don jingtip satia mano ba pyntrei ia kane ka kam hynrei u tip ba kane ka puh shilum ka dei jong uwei u briew na Nongstoin.
Ha kane ka por, la wan poi sa kiwei ki briew kiba dei ki nongpeit ia ka jingtrei, kiba la pyntip ba kane ka jingksam ia ka mei ramew ka dei na ka bynta ban ksam ia u maw magnet. Hynrei namar ka jingbym lah ban pynshai bha, u majistor ula bthah ban pynsangeh shuwa shipor ia baroh ki jingtrei tad haduh ba ka bor District ka pyntip da kumwei pat.
Halor kane ka jingksam marpoh khyndew, ki Nongshongshnong ka Mawmluh-II bad ka Mawliehpoh, kila pynpaw ia ka jingpyrshah kaba jur.
