Nongpoh, Lber 11: Ki Pulit ka Nongpoh Police Station, hynne ka sngi Nyngkong, kila hiar tohkit ha Iew Mawlong, Nongpoh halor ka jingmih ka jingkynnoh ba bun ki dukan die kot skul, kila shim kabu ha ka jingdie ia ki kot da kaba shim dor tam kaba long hapdeng 5 tyngka haduh 10 tyngka kawei ka kot.
Kane ka jinghiar tohkit ki Pulit kala wan jia halor ka jingujor jong ka seng Khasi Students Union-Nongpoh Circle, kaba la shem dalade ia ka jingshim kabu jong ki nongdie kot skul ha kane ka Iew lyngba ki jingjurip bala pynlong ha ki taiew bala lah.
Ki Pulit kila leit ban tohkit ia ki katto katne ki dukan die kot bad kumjuh ruh kila kylli pyrthew ia ka dor kot na ki nongthied kot ha kaba kila shem ba ka don shisha ka jingdie tam ia ka dor na kaei kaba la shon ha ka kot kaba dei ka Maximum Retailed Price. Ki Pulit kila lap ba kine ki dukan kila die haduh 5-10 tyngka ka jingiohnong na kawei pa kawei ka kot.
Katto katne na ki nongdie kot kila pynksan ia kane ka jingshim dor tam ia ki kot da kaba ong ba kane ka jingdie tam ia ka dor dei na ka bynta ban pynmih ia ka baikit bai bah ia ki mar kiba wan pynpoi na Shillong ha kane ka Iew.
Ki Pulit kila lum kyrteng ia baroh ki dukan die kot kila die dor tam bad kin sap hah ia ka kaiphod sha u Deputy Commissioner ka District ba un leh ia kaba donkam.
Ha kane ka sngi naka liang ki bor pulit ki la dep ban shim lut iaki kyrteng jong ki die kot bad kin phah pat iaka report sha u Deputy Commissioner ka Ribhoi khnang ba un ioh ban leh iaka ba donkam.
