Nongpoh, Naitung 21 : Ka Estimate Committee jong ka Iingdorbar Thaw Ain ka Jylla, dang shen, kala hiar tohkit ia bun tylli ki project ba sahteng bad ba ieh shiteng jong ka Tnad Pule Puthi bad ka Koit ka Khiah ha kylleng ki District ka Jylla ban tip ia ki daw ka jingbym lah pyndep kat haduh mynta mynne.
Kane ka jinghiar tohkit ka dei kaba la pynlong dang shen ha ki 5 tylli ki District ka Jylla kiba kynthup ia ka Eastern West Khasi Hills, West Khasi Hills, East Garo Hills, West Garo Hills bad Ri-Bhoi District.
Kane ka Committee ka dei kaba la khlieh da u MLA ka Nongpoh Bah Mayralborn Syiem kumu Chairman bad ki dkhot ki kynthup ia u MLA ka Mawkyrwat Renikton L Tongkhar, MLA ka Jowai Wailadmiki Shylla, MLA ka Mawhati Charles Marngar, MLA ka Ampati Miami D Shira bad MLA ka Umroi Damanbait Lamare bad kiwei kiwei.
Kane ka jinghiar tohkit kala sdang naduh ka 19 tarik Naitung bad ha kane ka sngi, ka Estimate Committee kala hiar leit jngoh ia ka Residential School ha Lawbyrtun, Mawthadraishan, Eastern West Khasi Hills, ka Polytechnic Institute ha Nongstoin, Nongchram Demik Residential School ha Rongjeng, East Garo Hills bad ka Eklavya Model Residential School Samanda, East Garo Hills.
Ha ka 20 tarik Naitung, ka Committee kala phaikhmat sha West Garo Hills District bad kala leit jurip ia artylli ki project ba sahteng jong kine ki artylli ki tnad treikam ka Sorkar ba kynthup ia ka Trauma Centre ha Tura Civil Hospital bad ka Edenbari ABDK Residential School ha Rongram.
Ia kane ka jinghiar tohkit la pynkut ha ka 21 tarik Naitung ha Ri-Bhoi District bad ki project bala leit ban jurip ha kane ka sngi ki kynthup ia ka Eklavya Model Residential School project ha Pahamsyiem, Umling CRD Block, ka Polytechnic ha Nongkhrah, Nonglyngdoh, ka Trauma Centre ha Nongpoh Civil Hospital bad ka Maternal and Child Health Hospital ha Umsning.
Ha kine ki jinghiar tohkit, ka Committee kala pynlong ruh ia ka jingialang kaba iatai bniah bad ki bor District lem bad ki Heh Ophisar ka Tnad ka Koit ka Khiah, ka Tnad Pule Puthi, ka Tnad PWD bad kiwei kiwei ki Tnad halor ki daw ba pynlong ia kine ki project ban sahteng sah.
Haba iakren bad ki nongthoh khubor ha kane ka sngi ba khatduh ha Umsning, u Chairman ka Committee ula ban jur ia ka jingkut jingmut jong ka Committee ban pynthikna ba dei ban trei pyndep noh ia kine ki project ba sahteng kham kloi kat kaba lah.
U Chairman ula kdew ruh ba ka jingsahkut jong ki katto katne ki project ka lah ban dei namar kiba bun ki daw kynthup ka jingbym don pisa, ka jingduna haba pynkhreh ia ka mang pisa ia ki project bad kiwei kiwei. Ula pyntip b aka Committee kan sa nang buddien ia kine ki project ban pynthikna ba ki dep noh khnang ba kin long ki jingmyntoi ia u paidbah.
Pule ruh: Kyntu ka KJCLF ia ka Meira Paibis ban iada ia ki Kynthei ha Manipur
