Imphal, Jylliew 10 : Ka kynhun ki kaikhlaw kala hiar thma ia ka kynhun ki bor pahara kiba leit ban khmih ia ka jinglong jingman ka Jiribam District hashuwa ka jingleit iuhkjat u Myntri Rangbah ka Jylla. Kane ka jingjia kala jia hynne ka step hajan ka shnong K Sinam.
Kat kum ka khubor la iathuh ba arngut ki bor pahara kila mynsaw ha kane ka jingshah ther kuli. Hynrei, ym pat lah ban pynthikna ba haduh katno ngut kila mynsaw namar ka jingiather kuli kala jur bha.
Ki bor Sorkar kin dang ban pynthikna mano ba donkti halor kane ka jinghiar thma. Ki bor pahara kila pynkhlain ia ka jingpahara ha ka thain bad pynlong ruh ia ka jingkhynra kaba jur.
Kane ka jinghiar thma ia ki bor pahara kala jia hashuwa ka jinghiar iuhkjat u Myntri Rangbah N Biren Singh sha Jiribam kaba don hapdeng ka jingiaumsnam.
Ki kaikhlaw kila hiar thma ia kine ki bor pahara hajan Kotlen. Kine ki bor pahara ki dei kiba ju pahara ia u Myntri Rangbah ka Jylla, kiba la leit shwa ma ki sha Jiribam ban ap ia ka jingwan poi u Myntri Rangbah u ban wan da ka helicopter.
