Shillong, Jymmang 12: Hadien ba ka KHADC kala rai ban khang pyrshah ia ka jingot kilo ki mahajon ia ki marrep ba wan die da ki Nongrep ha Iewduh, ka Myntri ka rep ka riang Kong Ampareen Lyngdoh kala hiar iuhkjat hynne ka sngi Thohdieng sha Iewduh ban sngap dala ki jong ki skhor ia ka jingeh ki Nongrep na kane ka jingtreikam beain jong ki mahajon.
Ia ka Myntri la synran da ki MLA ka Voice of the People Party (VPP) ba kynthup ia u President bad MLA ka Nongrem Bah Ardent M Basaiawmoit, MLA ka North Shillong Bah Adelbert Nongrum bad u Syiem ka Hima Mylliem Bah Ainam Manik Syiem.
Kane ka kynhun ki Nongmihkhmat paidbah, kila ioh iakren bad ki nongrep, ki nongkhaii bad ki nongsiew nongtda ha kaba kila pynsngew bad pynsngewthuh ia ka jingdonkam ka jingiatreilang ban lah wanrah ia ka jingmyntoi jong baroh hapoh Iewduh.
Haba iakren bad ki nongthoh khubor, ka Myntri kala pynpaw ba ka jingwan jurip ia ka Iewduh ka dei ruh kum ka jingbuddien ia ka Bill jong ka KHADC bad ka hukum jong ka Ophis u Syiem ka Hima Mylliem ban pynduh noh ia ka kyntien “Ot Kilo” ia ki marrep ba wan die da ki Nongrep hapoh kane ka Iew kyntang ka Jaidbynriew bad ha kiwei kiwei ki iew ba hap hapoh u pud u sam ka District Council.
“Kala donkam palat ban pynduh iaka kyntien ‘Ot Killo’ iaki mar rep ha ki Iew namar kane ka pynduh nong bha iaki nongrep ka jylla” ong ka Myntri haba pyntip ba ka Tnad kam rep kam riang ruh kala shim khia haba iadei bad kane ka jingeh jong ki Nongrep kiba wan die ia ki marrep ha Iewduh.
“Nga ai khublei ia u bah Ardent uba la rah hapoh ka iingdorbar ia kane ka jingshah Ot Kilo ki mar rep ha ki Iew bad nga kwah ban iathuh sha phi ba naka liang ka sorkar jylla lyngba ka tnat ka rep ka riang ruh kan shim khia halor kane khnang ba ki nongrep bad ki nongkhaii ruh kim dei ban duhnong” ong ka kong Ampareen.
