Shillong Naitung 08: Ka Employment Monitoring Cell jong ka KSU hynne ka sngi Nyngkong kala leit iakynduh ia u Dean jong ka College of Post Graduate Studies ha Agriculture Sciences Umiam ban pan jingshai halor ka jingbym mih kyrteng ki samla Khasi-Jaintia naka bynta ka Post Library Assistant.
“Kat kum ka Advertisement ba la pynmih paidbah ha ka 30.10.2023, kila don ar tylli ki post ba lait na bynta ka post Library Assistant, kawei na bynta ka Unreserved Category bad kawei na ka bynta S.T Category ha kaba la shem ba na ki 23 ngut ki samla kiba la aplai ia ka kam, ym shim la don ka kyrteng jong ki samla na ka Khasi-Jaintia category watla ki lah aplai ia katei ka kam” la pynpaw ka KSU ha ka kyrwoh khubor.
Kila pyntip ba na ka liang jong u Dean kane ka College ula pynshai ba ki khynnah Khasi kiba aplai ia kane ka kam kim shim don ia ka Bachelor Degree, hynrei ki pyndep ia ka Bachelor Degree ka jongki na kiwei pat ki jingpule bad ki leh ia ka Master ka jongki ha ka Library & Information Science bad katkum ka Ordinance jong ka Central Agricultural University ba lah pyllait ha 18.10.2023, ki nongthep kam na bynta ka Library Assistant ki dei ban pyndep ia ka Bachelor Degree ha Library & Information Science.
Ka Seng kala pynsngew ha u Dean ba ha ka jylla Meghalaya, ym pat don ka Bachelor Degree na bynta ka Library & Information Science bad kane kadei kawei na ki daw ba ki samla ka jylla kim shim ioh lad ban pyndep ia kane ka jingpule.
Ka KSU kala dawa ban pynsangeh shwa shipor ia ka jingthep kam na bynta ka Library Assistant katba kam pat ioh lad ban mudui ban pynkylla ia kane ka Ordinance ban ailad ia ki samla Khasi ban ioh thep kam ha kaba iadei bad kane ka bynta.
