Shillong Nailar 26: Ka Myntri Khynnah ka Sorkar Pdeng kaba khmih ia ka Tnat ka Koit ka Khiah, ka Dr Bharati Pravin Pawar ha ka sngi Thohdieng, kala leit jngoh ia ka Khliehriat, East Jaintia Hills District ban peit bniah ia ka jingiaid shaphrang ka jingpyntreikam ia ki skhim bapher bapher jong ka sorkar pdeng.
Ka Myntri ka la ong ba ki skhim ki la treikam bha ha Meghalaya kum ka MGNREGA ha kaba ka jingjop ka long 99 percent.
“Ha u snem ba la dep, ngi la iohpdiang ia ka mang tyngka kaba 33 klur na ka bynta ka MGNREGA, kaba la iarap ia palat 25,000 tylli ki longing, mynta u snem, ngi la ai ka mang tyngka katkum ka jingkiew ka jingdawa” ong ka Dr Pawar bad ka bynrap ba ka MGNREGA kala long kaba jop ha East Jaintia Hills District.
Haba kren shaphang ka PM AwasYojana, kaba thmu ban pynbiang iing sah ia ki briew ba duk, ka Myntri kala ong, ba la bhah ia ka mang tyngka kaba kynthup 882 tylli ki longing bad kala pyntip ba kila don ki sienjam ban mang pisa shuh shuh na ka bynta ki iing kiba paka.
Kala kren ruh shaphang ka National Rural Livelihood Mission (NRLM), kaba ai jingkyrshan ia ki briew lyngba ki Self Help Group (SHG) bad ka ong, ba ki SHG ki long ka sienjam ba biang jong ka sorkar bad la ithuh ia ki khynnah kiba duna ka bam kaba tei lyngba ki SHG na ka bynta ka jingeksamin ia ka koit ka khiah da ka Tnat ka koit ka khiah ha ki jaka nongkyndong.
Ka Dr Pawar kala ong ba ka Public Works Department (PWD ka la mang T.126 klur ha u snem ba la dep ban shna ia ka surok kaba 39 km ban pyniasoh ia phra tylli ki shnong. Kane ka surok kan long ka jingmyntoi ia ki nongshong shnong ba sah ha ka thain Khappud India bad Bangladesh bad la buh thong ban pyndep hapoh ka shi snem shiteng ban wan,.
Ka Myntri ka la ong ba ka jingmang pisa kala kiew na ka T. 1,80,0000 ha u 2022 sha ka T. 2,60,0000 mynta u snem ha kaba iadei bad ki Primary Health Center (PHC) bad kala batai ba ka sorkar pdeng kala mang pisa T.1,23,0000 bad T.2,20,0000 na ka bynta ban pynkhlain ia ki PHC, Sub-Centre bad ki Diagnostic Lab.
“Ka Pradhan Mantri Arogya Yojana, ka skhim Insurance kaba heh tam, ka ai haduh san lak na ka bynta ka jingai jingsumar ia ka longiing bad haduh mynta, ki don 17,000 ngut ki briew kiba la ioh jingmyntoi haba ki donkam ban ioh jingsumar kyrkieh bad ki donkam ban shah puid, ha kaba ki jingmyntoi kila kot sha palat 10 klur,” ong ka Dr Pawar.
Kala kren ruh shaphang ki sienjam jong ka sorkar pdeng ban pynduhjait iaka jingpang Tuberculosis (TB) ha ki PHC bad ki Health and Wellness Centre (HWC).
“Ngi la ai jingsumar ei ha iing lyngba ki PHC, ki HWC bad ka jingthmu jong ngi ka long ban leh Screening ia ka jingpang Breast Cancer, Cervical Cancer, Hypertension, jingpang shini bad kiwei kiwei,” kala ong.
Ka Myntri ka la ai khublei ia ki bor pyniaid jong ka jylla kiba la pynkot haduh 88 per cent ka jingioh jingkoit ha ki jaka sumar.
“Ha u snem ba ladep, ka jingioh jingkoit ha ki jaka sumar ka long 54 percent bad kala kiew sha ka 76 percent. Mynta u snem, ka long kumba 88 percent. Ngi thmu ban pynbiang ki lad ioh jingsumar ha kine ki jaka bad ruh ba ngin pynbiang ka jingshakri ia kito kiba kham don ha ka jingma. Ha kaba iadei bad ka HIV, ka thong jong ngi ka long ban pynbiang ki dawai, ai ka jingiasyllok, ki jaka test bad kiwei kiwei lyngba ki ART Centre” la ong ka Myntri.
Pule ruh: Palat 200 ngut ioh jingsumar ei ha ka Medical Camp ki BSF ha SWGH
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
