Imphal, Jymmang 16 : Ki shipai Indian Army bad ki Assam Rifles kila phah mynta ia ka pyrton pahara sha ki jaka khappud ka India-Myanmar ban pynkhlain ia ka jingpahara ha ki jaka kiba don jingma na ka jingmih ki jingjia iaumsnam na ka jingiakynad pher jaidbynriew hapoh ka Jylla.
Khnang ban wanrah biang ia ka jingshongsuk ba kham kloi ha Manipur, ki shipai India Army ha ryngkat ka jingiasyllok bad ka Sorkar bad baroh ki kynhun, kila pynkhreh ia ki sienjam pahara ba thymmai ban weng noh ia ka jingsheptieng jong baroh ki Jaidbynriew ka Jylla kiba sah ha ki jaka kiba don ka jingma na ka jingkhie ka jingiakynad jaidbynriew.
Palat 128 column ki shipai Indian Army bad Assam Rifles, ki Unmanned Aerial Vehicle & RPA la pyndonkam ha ka ban tehlakam ia ka jinglong jingman hapoh ka Jylla khnang ban lah wanrah pat kham kloi ia ka jingshongsuk.
Ka Tnad shipai kala phah ia ka kynhun kynthei jong ki shipai Assam Rifles ban iaid pahara da ki bun bun kynta ha ki jaka bala ithuh kum ki jaka ba ikop mih jingkulmar bad ia kane la leh ha ryngkat ka jingiasyllok lang bad ka Sorkar Jylla ha kine ki 72 kynta bala leit noh, ong ka kyrwoh na ki shipai.
Ka kyrwoh ka iathuh ba kine ki kynhun iaid pahara kila leit rung ha manla ki shnong jong ki jaidbynriew bapher bapher, iakren iakhana bad ki trai shnong, ki kynthei bad ki riew rangbah, ym tang ban ai jingkular ia ki ba kin long kiba shngain hynrei ban ai ruh ia kano kano ka jingiarap kumka jing pynbiang ia ki dawai dashin bad kiwei kiwei.
Ka jingkulmar ba thymmai kala jia ha ka thain Saparmeina hynrei da ka jingshimkhia ba mardor jong ki shipai, ia kane ka jingkulmar la lah ban tehlakam noh.
Ka jingpynkhlain pahara jong ki shipai ha khappud India-Myanmar ruh ka dei kaba la shimkhia ban lah tehlakam ia kano kano ka kam pyntriem jong ki kynhun kaikhlaw. Ki shipai kila pyndonkam lut ia baroh ki kor ki bor naduh ki UAV, ki helicopter bad ki ksew sma dien ban tehlakam ia ka jingshim kabu jong ki kynhun kaikhlaw ia ka jinglong jingman ha kane ka Jylla.
