Shillong, Nailar 28 : U Symbud Myntri Rangbah ba khmih ia ka kam Pohiing (Police) Bah Prestone Tynsong ha ka sngi Thohdieng ula ong ba ia ka jingdon jong ki Special Force-10 (SF-10) la pynhiar na ka 1,794 sha ka 901 ngut ha u 2020-21 hadien ka jingbishar bniah ia ka jinglong jingman ka suk a sain, haba ban jur ba ka jingthmu ba kongsan hi ka dang iai neh kumjuh.
Haba jubab ia ka cut motion bala wanrah da u Nongialam ka Liang Pyrshah Mukul Sangma ha Iingdorbar Thaw Ain, u Bah Prestone ula ong ba ia ka SF-10 la pynkha ha u snem 2014 da ka Sorkar u Mukul Sangma ban iakhun ia ki kam kaikhlaw bad pyndonkam haba don ka jingthut ka shongsuk shongsain.
“Ka jingdon ki Commando haba sdang ka long 1794 ngut, kynthup ia 180 ngut ki Kynthei bala phiah sha ka Commando wing ba long 66% bad ka Law & Order ba 34%. Namar ka jingkylla ha ka jinglong jingman, la wanrah ia ka jingpynkylla bad la pynbeit ryntih ia ki, kaba pynduna ia ka jingdon ki commando sha ka 901” ula ong.
Ia kane ka bor pahara la phah mynta ba kin don ha ki artylli ki kut ha Eastern bad Western Range ula ong bad bynrap ba ia ka kyrdan jinghikai bad ka jingbha ym shym la pynthut eiei bad ia ki jingtbit la ju pynkiew kyrdan man ka por.
U Bah Prestone u iathuh ba ju pynlong ruh ia ki Physical Proficiency test ba man ka por bad katto katne ki Commando la pynkynriah noh sha ki DEF lane battalion haba pynshong nongrim ia ka rta, hynrei ka mynsiem jong ka SF-10 hi ka dei ka bym lah ban pyntlot.
Haba wanrah ia ka cut motion, u Mukul Sangma ula ong ba ka Meghalaya khatduh kala lah ban lait na ka jingshaniah ha ki bor pahara ka Sorkar pdeng kum ka COBRA da kaba wanrah iala ka jong ka kynhun Commando SF-10, hynrei ia ka jingthmu jong kane ka kynhun la pyntroon noh mynta.
U Mukul ula ong ba ka Jylla baroh shikatta ka ju shaniah ha ki bor pahara ka Sorkar Pdeng namar ka jingbym don ki bor pahara ba biang nala Jylla, tad haduh ka rai ban sei iala ki jong ki briew kynthei bad shynrang ban iada iala ka jong ka Jylla.
Ia ka SF-10 la pynkha da artylli ki shnat-ka Rangers bad Battalion-katba ka Battalion ka iaid lyngba kawei na ki jingjied bad jinghikai kaba eh tam ka ban pyni ia u pud ka jinglah jong ki shipai, ula ong.
U la ong ba ka jingmut ba kongsan ka long ba ki briew kiba la shah hikai na ka bynta ki kam ba kyrpang ki dei ban pyniakhlad bad shah pynlait na ki kam pulit ba man ka sngi, namar ka Tnad pulit ka dei ka bynta kaba kongsan ha ka jingpyniaid ia ki kam ban pynioh ia ki jingbishar ba hok.
Ula ong ba ka jingpynkynriah ia ki commando bala dep hikai pyntbit sha ki DEF bad kiwei ki kam, ka dei kaba leh khlem da pyrkhat ia ka jingthmu ha lyndet ba pynmih ia kane ka kynhun, U ong ba ia kane dei ban pynbeit noh.
U Mukul ula maham ba ka Jylla ka lah ban mad ia ki jingtynjuh kiba khraw bha lada mih ki jingjia kiba pynsniew ia ka jinglong jingman haba kdew ia ki jingjia ba dangshen bala sakhi ha Tura.
 Bah Prestone Tynsong ha ka sngi Thohdieng ula ong ba ia ka jingdon jong ki Special Force-10 (SF-10) la pynhiar na ka 1,794 sha ka 901 ngut ha u 2020-21 hadien ka jingbishar bniah ia ka jinglong jingman ka suk a sain, haba ban jur ba ka jingthmu ba kongsan hi ka dang iai neh kumjuh.){kind=link}