Shillong, Naiwieng 24: Ka Khasi Hills Autonomous District Council (KHADC) bad ka Dorbar Shnong Laitkor Mawrie Lumheh, hynne ka sngi Thohdieng kila pynlong ia ka jingkhynra Trading Licence bad shem ba uwei u Bar Jylla ula ioh ban khaii hapoh ka Shnong la palat 15 snem khlem ka Trading Licence na ka District Council.
Kane ka jingkhynra Licence ka dei kaba la pynlong da ka Dorbar Shnong Laitkor Mawrie Lumheh haka jingdon lang ki pulit Enforcement jong ka Khasi Hills Autonomous District Council (KHADC) bala ialam da u EM ba khmih iaka Trade u Bah Gigur Myrthong.
Ha kane ka jingleit kynra, ka Dorbar Shnong bad ka KHADC kala shem ba uwei u bar jylla ula ioh ban khaii pateng hapoh kane ka shnong la palat 15 snem khlem ka Trading License.
U Rangbah Shnong ka shnong Laitkor Bah Pynshailang Mawrie ula pyntip ba la kumba 15 snem eiei, ki bar jylla ki trei laitluid hapoh ka kyntoit jong ka shnong bad na ka liang jong ka Dorbar Shnong, ka la phah da ka shithi sha u Chief Executive Member (CEM) ban wan kynra iaki Trading Lincense.
U iathuh ba dei halor kane ka shithi, u CEM ula phah ia u EM ka tnad Trade lem bad ki Pulit Enforcement ba kin wan pynlong ia ka jingkhynra ban lap ia ka jingshisha bad ban leh ia kaba donkam.
Ha kane ka jingleit kynra, u EM ba khmih iaka Trade ula shem hi da lade ba ki bun ki bar jylla kim don ia ki kot ki sla kiba biang bad na ka liang ka shnong bad ka KHADC ki la khang khyrdep noh ia ki dukan jong ki.
U Bah Gigur Myrthong ula ong “Ka district council kala ioh jingtip naka Dorbar Shnong bad ki don ki bar jylla kiba la wan khaii hangne ba kim don satia iaki kot ki sla bad kila don ruh ki dukan kiba la shu wan kam trai da ki Khasi bad naka liang ka district council kala bthah iaka Dorbar Shnong ban wad jingtip ba khambniah shuh shuh”.
U Bah Gigur ula iathuh ba ki don kumba 20 tylli ki dukan ki bym don iaki Trading License bad naka liang ka KHADC kan sa leh iaka ba donkam ban tih kham bniah ban lum jingtip iaki bar jylla ki bym don iaka Trading License.
